KHAWTHLIR

7th. Pay
Finance minister Lalsawta chuan MNF member Dr K Beichhua zawhna chhangin, Mizoram sorkarin a hnuaia thawkte 7th. Pay hmantir tumna emaw, hmantir loh tumna a neih loh thu House a hrilh a, "7th. Pay hmantir hun tur hriat a ni lo," a ti.

DAY-NULM zirtir
Nimin khan Hnahthial market building hall-ah Lungleia UDPA department-in Deendayal Antyodaya Yojana-National Urban Livelihoods Mission (DAY-NULM) chungchang inzirtirna hun an buatsaih a; Hnahthial khuaa sorkar pisa hotu te, khawtlang hruaitu V/C, tlawmngai pawl, kohhran leh political party hruaitute leh chanchinbumite an tel.

MZU-ah workshop
Mizoram University-a Department of Mathematics & Computer Science leh Machine Intelligence Unit, ISI, Kolkata-te chuan nimin khan MZU-ah 'ISI-MZU School on Soft Computing Techniques: Theory and Application' tih thupui zirhona an buatsaih a; Mar 24 thleng neih a ni ang. Workshop-ah hian subject hrang hrang an zirho dawn a ni.

Ruang chhar
March 19, 2017 zing dar 8 vel khan Hunthar Veng thlanmual mawngah mipa ruang chhe tawh tak hmuh a ni a, a chhiat deuh tawh avangin nimin thleng khan tu nge a nih hriat a la ni lo. Police PRO tarlan danin, ruang chhar hi police leh Hunthar Veng YMA-te'n an buaipui a, nimin khan doctor-te'n an endik a, kum 30-40 vel inkar, ft. 5'5" vela sang a ni. Ruang hi March 22 thleng Aizawl Civil Hospital-a mitthi dahnaah dah a ni dawn a; mahni chhungte leh ṭhiante awmna chin hre lote tan enfiah theih a ni.

Hmingthlak
Aizawl Municipal Corporation chuan Section 23 (3) of the Mizoram Municipalities Act, 2007 leh Board of Councillors resolution bawhzuiin Chaltlang North Local Council tih ṭhin chu Chaltlang Lily Veng Local Council tiin an thlak.