World Forestry Day puala CM thuchah

Vawiin March 21 hi World Forestry Day a ni. He ni pual hian chief minister Lal Thanhawla chuan thuchah a tichhuak a; kumina Day thupui chu 'Forest and Energy' tih a nih thu sawiin, "He thupui hian mihringte energy min petu pawimawh ber chu ramngaw a ni tih min zirtir a tum a ni," a ti.

Chief Minister chuan, thing (wood) hian khawvelin renewable energy a hmuh zawng zawng zinga 40% vel a pe chhuak tih tarlangin, "Energy kan hmuhna dang solar, hydro-electric leh wind power-te aiin a lêt eng emaw zatin a thawh hlawk a ni," a ti a; chutih laiin, tunah hian mi nuai 8830 vel chu thing leh a kaihhnawiha ei zawng mekte an nih thu a tarlang.

CM Hawla chuan, ramngaw tel loin ecological balance a awm theih loh avangin ramngaw tihchhiatin buhbâl thar a tihlâwk lo a, khawvel economy a che zawngin a nghawng ṭhin tih a sawi a, "Ramngaw hi hun lo kal tura khawvelin energy a mamawhte kan khâwl khâwm theihna a ni a, chu chuan hma­sawnna tlo leh tluantling min thlen thei chauh dawn a ni," a ti.

Mizoramah ram hring (green cover) a la zauh viau rualin, ramngaw ṭha (virgin forest) erawh chu Mizoram zau zawng aṭanga tehin 0.65% chauh a awm tawh thu sawiin, Lal Thanhawla chuan, "kan enkawl ṭhat tawk loh avangin kan ramngaw ṭhate a kiam zel a. Ram dang chauha thleng tura kan ngaih, ramngaw chereuin a nghawng ṭha lo - tuihna tlém leh kangchat te, ruah­tui tlak dan mumal lo te, khaw lum chak lutukte leh buhbâl thar hlawk lote pawh Mizo­ramah kan tawng chho ve ta zel a ni," a ti a; pawi a tih thu a sawi.

Chief Minister chuan, ram­ngawte duat tur te, sorkar, pawl leh mimal thing phunte humhalha zahsak tur te, ram leh hmun âwl apianga thing phun uar lehzual turtein Mizoram mipui a chah a ni.

Sorkar thuchhuah chuan, kum 1971-ah European Con­federation of Agriculture-in mihring leh nungchate dam khawchhuah nan ramngaw a pawimawhzia leh khawvel sik leh sa inbûktâwka siam tura a ṭangkaizia inzirtirna atan World Forestry Day an hmang ṭan niin a tarlang.

Tun dinhmuna khawvelin ramngaw ṭha a neih zawng zawng hmun thuma ṭhena hmun hnih vel chu Canada, Russia, Brazil, USA, Congo, Australia, Indonesia, China, Peru leh India ramah a awm a ni.