GP Fund dilte pek chhuak vek kan châk - Finance Minister

Finance minister Lalsawta chuan, Mizoram sum dinhmunin zir se chuan sorkarin a hnathawkte'n an dil ang anga GP Fund pek a châk thu House a hrilh.

MNF member K Sangṭhuama zawhna kal zelah Finance Minister chuan, "Kan pawisa dinhmunin zir se an dil ang ang pek kan châk. GPF hi 8.7%-in a pung ṭhin a, January 2017 aṭangin 8.1%-ah a tlahniam a ni," a ti a; sum dinhmunin a zir loh avangin an duh anga GPF an pek chhuah theih loh thu a sawi.

Lalsawta chuan, GPF lak chhuah dilna Chief Minister, Minister, Parliamentary Secretary leh MLA-te'n an dawng hnem thei hle tih sawiin, "GPF atan hian Finance department-a deputy secretary chin chung lam, under secretary (APF) bik tiamin quarter khatah quota cheng nuai 40 reserve fund pek a ni. Chief Minister, Finance Minister leh Parliamentary Secretary (Finance) tan chuan bithliah chiah a awm lo," a ti.

Finance Minister sawi danin, sorkar sum dinhmun en chungin GPF pek chhuah ṭhin a ni a, damlohna vanga refer case a tam avang leh kawng dang pawha mamawh an tam avangin sum dinhmun ena pek chhuak a ngai. Cheng nuai 40 reserve sakte pawhin sum dinhmunin a zir loh chuan an quota ang zat an pe chhuak kher lo.

GPF pe chhuak theite siam a nih bakah hian, quarter tinah department zawng zawng thleng turin cheng vbc. 35 pek chhuah ṭhin a ni. Chu'ngte chu department-in a ṭul angin an pe chhuak a, an duh zat ang hmu lo mamawhna vanga mangangte chu Finance hotute lamah an tlan a, an niin an lo ngaihtuahsak ṭhin.

Lalsawta chuan, tuna GPF pek chhuah dan kalphung chu chu a ṭha tâwka an hriat thu sawiin, "Tuna kan tih dan hi a ṭha berin ka hria. Dan leh dun pawh ngaihtuah loin an awlsam tur kan ngaihtuah ṭhin," a ti.