Sorkar bituk anga fee la turin ngen

MZP chuan thuchhuah siamin, Mizoram sorkarin a bituk ang ni loa zirlaite aṭanga admission fee la ṭhin sikul tam tak an awm tih an tarlang a, pawi an tih thu an sawi a; sikul tinte chu sorkar bituk anga fee la turin an ngen.

MZP chuan, sorkarin admission fee lak zat tur a bituk anga fee la vek turin sikul zawng zawng thuneitute an ngen a; School Education department thuneitute pawh sorkar thuchhuak ang ni loa admisson fee la ṭhin sikulte chungah dan anga hma la turin an ngen bawk.

MZP chuan, March 17, 2017-a Mizoram Legislative Assembly session-ah 'Mizoram state-in All India Services (IAS, IPS, IFS) separate cadre a neih ve ngei theih nan theihtawp chhuah ni rawh se,' tia pass a nih chu lawmawm an tih thu an sawi bawk a ni.

School Education department-in March 16, 2015-a notification a chhuaha school admission fee lak dan tur a siam dan chu -
1. Private/lump-sum aided school-ah
i) KG - Class VIII (Elementary) - Rs. 3,000 aia tam lo
ii) Class IX-X (Secondary) - Rs. 4,000 aia tam lo
iii) Class XI-XII (Arts) - Rs. 4,500 aia tam lo
iv) Class XI-XII (Arts practical nen) - Rs. 5,000 aia tam lo

2. HSS (Deficit/Adhoc)-ah
i) Science/Computer Sc./Vocational - Rs. 1,520 aia tam lo
ii) Arst (Practical nen) - Rs. 1,000 aia tam lo
iii) Arts (Practical tel lo) - Rs. 850 aia tam lo