MNF sorkarin anmahni sawiseltu An ngaithei lo tulh tulh - Duhoma
ZPM Legislature Party leader hlui Lalduhoma chuan, MNF sorkar chuan Assembly House emaw, hmun dangah emaw pawh ni se, anmahni sawiseltute a ngaithei lo tulh tulh tih a sawi.
Lalduhoma hian November 28, Inrinni zan khan MLA aṭanga paih a nih chungchangah Serchhipa cable TV kaltlangin thuchah a sawi a, "MNF sorkarin anmahni sawiseltu Assembly House chhung emaw, páwnah pawh ni se, a ngaithei lo telh telh. MNF sorkarna hnuaiah Mizo mipui kan zalen lo ta hle a, hei hi pawi ka ti tak zet a ni," a ti.
A chunga thil thleng chu MNF chunga thleng ni se, bomb puakin, lim hâl leh total bandh-te huaihawt a nih ngei a rin thu sawiin Lalduhoma chuan, "Ṭhalai thisen lum tak tak kan nei chungin, lungawi lohna vanga buaina awm loin an lantir a, a tàwpah ṭawngṭai rualin an ṭîn a ni," a ti a; an chunga thil thleng chu ram hlui zia anga dawngsawng loin, a dam thei angin, Pathian hnenah an thlen mai thu a sawi.
Serchhip Bialtu MLA hlui chuan, a kal zel dan turah political party, kohhran leh NGO-te ngaihdan hriat an duh thu sawiin, "MNF party-ah ngei pawh min lainattu 'Kan pute thil tih dan hi a lutuk deuh a ni' ti an awm tih kan hria. Phone kan dawng hnem khawp mai," a ti.
Lalduhoma chuan, MNF chu inthlan an chuh hmasak berin independent-in an ding tih sawiin, "Independent ni mah se, MNF an ni tih kan hre vek a, tuma'n an hêk lo. An tih danin kan han ti ve a, dan a bawhchhia min ti leh si. Independent tak tak leh tak tak lo chu a hriat vek a, independent tak takin symbol, manifesto, flag, etc. inang an hmang ngai lo," a ti a; a chunga thil thleng ang chu India ramah a la thlen ngai loh thu a sawi.
ZPM thlan tlin a nih thu sawiin Duhoma chuan, "ZPM ta ka ni a, bial mipui pawhin ZPM thlan tlin ka ni tih in hria. Mahse, min hêkna chu a ZPM lutuk tih a ni. Thubuai min siamsak ang hi India ramah thubuai a la awm lo. Independent tak tak, party dang zawmte lakah erawh action an la ṭhin. Thlang tlingtute uiresan ve miah lo dan bawhchhiaah min puh lui a ni," a ti.
Lalduhoma chuan, Chief Minister zahawm tak pawi sawi a neih leh neih loh a ngaihtuah ṭhin thu sawiin, "Session-a 'Ka phuahchawp', 'Ka risk' tih a sawite kha ka sawi emaw ka sawitir emaw a ni lo. Ama thusawi kha ka sawi emaw a ti a, min haw ta mai em ni aw ka ti ṭhin," a ti a; Chief Minister pawi a sawi àwm a hriat loh thu a sawi.
A chunga action latute MNF an ni kher chu hriatthiam har a tih thu sawiin Lalduhoma chuan, "MNF unaute thlamuang taka an mut a, chaw an kîl theihna atan ka tih theih zawng zawng ka hlàn. Arakan khaw vâwtin a hmeh hlum tur tuam lumtu ka ni ve tak tak a, chu'ng mite'n min chuk chu ná ka ti ve deuh ṭhin. Ram tinin opposition ṭha an mamawh a, kan tlema kan chak loh tehlul nen," a ti.