Sokar kum kal mekah MR bill atan Cheng vbc. 78.09 sen a ni tawh

Mizoram sorkar chuan kumin sorkar kum kal mekah sorkar hnathawkte leh an chhungte damlo inenkawlna senso, medical reimbursement (MR) atan cheng vbc. 78.09 a sêng tawh.

MNF member Lalrinawma zawhna ziaka Finance minister Lalsawta'n a chhan danin, MR bill cheng vbc. 78.09 hi department 59 hnena MR bill pek zat a ni.

MR bill pek tamna ber Police headquarters, Aizawl tan cheng vbc. 11.83 pek a ni a, pek tlemna ber chu Institutional Finance & State Lottery department chu Rs. 92,000 pek a ni.

Health & Family Welfare department-in notification a tihchhuah dan chuan, MR hi pay band-4 (Rs. 37,400- Rs. 67,000) chin tan deluxe-ah awm theih a ni a; pay band-3 (Rs. 15,600 - Rs. 39,100) tan private ward-ah awm theih niin, pay band-2 (Rs. 9,300 - Rs. 34,800) tan semi private-ah awm theih a ni. Sorkar hnathawk dang zawng tan chuan general ward-ah awm tur a ni thung.

Ei leh in atan sorkar hnathawk zawng zawngte ni khatah Rs. 80 bill phalsak an ni a, Mizoram páwn emaw chhung emawa damdawi-inah an awm a nih pawhin, bill theih zat a danglam lo.

Sorkar hnathawkte'n an kalna senso atana an bill theih dan chu - grade pay Rs. 10,000 leh a chung lamin thlawhtheihna bussinees class leh rêl AC first class; grade pay Rs. 7,600-Rs. 9,500 inkarin thlawhtheihna economy class leh rél AC first class, grade pay Rs. 5,400-Rs. 7,100 inkarin thlawhtheihna economy class leh rel AC-II tier, grade pay Rs. 4,200-Rs. 4,800 inkarin rel AC-II tier leh, grade pay Rs. 4,200 hnuai lamin relah first/AC-III tier/AC chair car-te a ni.

Hetih lai hian, sorkar kum thar 2017-18 budget-ah MR bill atan cheng vbc. 98.51 dah a ni a, hei hi budget pumpui aṭanga chhûtin 1.12% a ni.