CSS Hindi zirtirtute'n Mizoram sorkara Dah luh an phût thu an puang nawn

Mizoram CSS Hindi Tea­chers Association (MCHTA) chuan, nimin khan Vanapa Hall-ah Special Conference an nei a, resolution pass in, CSS hnuaia Hindi zirtirtute sorkara a ngheta dah vek turin Mizoram sorkar an phût tih an tarlang.

MCHTA resolution chuan, Central YMA hriatpuinaa MCHTA leh Mizoram sorkar aiawhte February 28, 2017-a an inremnaah, ‘Extension hi a hlawhtling lo a nih chuan state sorkarin a theih angin hma a la ang’ tih a ni tih tarlangin, "Central lamin extension hi thil theih a ni lo tih an sawi avangin kan inremna angin min absorb/dah­nghet vek rawh se," a ti.

MCHTA tarlan danin, New Delhi-a economic adviser Dr NK Sahu an hmuhnaah, CSS Hindi teacher-te thawh hun pawhsei chu plan period a tawp tawh avangin a theih tawh loh thu leh, Central lamin an tih tur an ti zo tawh a, state sorkar kuta awm tawh tur an nih thu a lo hrilh a ni.

Central evaluation/inspection team rawn kal tur chu CSS Hindi zirtirtu mi 1,305-te tan a him tâwk lo tih tarlangin, "Evaluation team hi rawn kalin, mark 100% pawh pe se, tuna Hindi teacher-te tan extension hi a theih dawn chuang lo a ni," an ti a; Dr NK Sahu chuan, MHRD-in CSS Hindi teacher nei state pali - Punjab, Nagaland, Odisha leh Mizoram-te chu absorb (regularise) turin Education Secretary ṭheuh hnenah lehkha an pek tawh thu a sawi niin an sawi.

An tarlan danin, Central thu bawhzuiin Punjab chuan CSS Hindi teacher-te regularise turin file an buaipui mek a, Nagaland Cabinet-in March 17, 2017-ah an ngaihtuah a, Assembly budget session-a pass turin an dah.