KHAWTHLIR

Ran entirna
Mizoram University-a Social Works department-a second semester zirlaite chuan, nimin khan Ṭuahzawl, Mamit district-ah rural camp neih chhunzawmin, AH&Vety department hnuaia Veterinary Polyclinic Hospital nen ṭangrualin animal free clinic an buatsaih a; mi eng emaw zatin an rante an entir. Chawhnuah Disaster Management & Rehabilitation department nen rîkrum thil leh chhiatna thlena chhawm-dawl hna thawh dan inzirtirna hun an buatsaih bawk.

College quiz
Mizo Students Union (MSU) leh Mizoram Public Service Commission (MPSC)-te chuan, nizan khan Ignite Studio, Aizawlah 2nd MPSC Challenge Inter College Quiz Competition 2017 an buatsaih ṭan. He inelnaah hian Mizorama college 17 an tel a, cable TV-ah live telecast-a pek chhuah a ni.

Sangha lei zat
Fisheries minister Dr BD Chakma chuan MNF member Lalrinawma zawhna chhangin, kumina Fish Mela neih zawh tâkah Mizorama sangha khawitute hnen aṭangin Rs. 6,47,675 sêngin sangha quintal 37.1 leisak a nih thu a tarlang.

Hockey-a inelna
Parliamentary secretary (Sports) Hmingdailova Khiangte, Hockey Mizoram president ni bawk chuan nimin khan Baktawng khelmuala Chawngkhuma Memorial Hockey Tournament, 2017 a hawng a; Baktawng Games & Sport Association hnenah hockey tiangkawm 24 leh ball báwm khat a pe nghal. Tournament-ah hian team 39 an tel a ni.