Bible House sorkarin a saksak dawn ; Khawmpui lian dâwl zo tur siam tum

Chief minister Lal Thanhawl­a chuan, leikhi vanga ṭhiah mek Khatla-a Bible House building chu hmun danga sa turin sorkarin ruahmanna a siam thu House a hrilh. Hetih lai hian, UDPA minister Zodintluanga chuan, inkhawmpui lian dâwl zo tur hmun siam tum a nih thu a sawi.

MNF member Lalruatkima zawhna kal zelah Chief Minister chuan, Convention Centre sak vanga Bible House leh a chheh­vela lei khi a nih leh nih loh finfiahna a awm lo tih a sawi a, "Covention Centre sak tur vanga tihchhiat a nih leh nih loh lam ngaihtuah loin, Bible House dang sakna tur hmun hi an lungawina thlap kan pe dawn. A sakna tur pawh PWD chhût dan chuan cheng vbc. 4 vel a ni a, hei pawh hi tihsak kan tum," a ti.

Lal Thanhawla chuan, Vanapa Hall chu a hlui tawh avangin Convention Centre sakna tur an zawn nasat thu a sawi a, "Hmun kan zawng nasa hle a, kan hmuh theih si loh avangin Circuit House ui tak chungin Convention Centre sakna atan kan ṭhiat a ni," a ti a; Vanapa Hall chu ṭhiat loa chei ṭhat a nih tur thu a sawi.

UDPA minister Zodintluanga sawi danin, Convention Centre sakna tur hi kum 2014-15 ah Special Plan Assistance aṭangin cheng nuai 2499.99 hmuh a ni a, agreement ang chuan April 2019-a sak zawh tura ruahman a ni.

Convention Centre-ah hian VVIP room, VIP room pakua, mi 50 leng meeting room, auditorium mi 300 chuang leng, mipa leh hmeichhe dormitory mi 21 ve ve leng, parking car 89 leh two wheeler 100 chuang leng siam a ni dawn.

Zodintluanga chuan, kohhran leh tlawmngai pawlte'n inkhawmpui lian an hman theihna tur hmun Aizawl khawpuiah siam tura hmalak mek a nih thu House a hrilh.

Minister Zodintluanga chuan, Aizawl khawpuiah infiamna hmunhma ṭha awm mah se, mipui punkhawmna tur hmun ṭha a la awm loh avangin sorkarin hmun siam a tum tih a sawi a, "YMA inkhawmpui leh kohhran ṭhalai khawmpui pawh dâwl zo tur, concert lian tham pawh siam theihna tura ruahman mek a ni," a ti.

UDPA Minister sawi danin, inkhawmpui lian dâwl zo tur hmun siamna tur hian NEDP hnuaiah sum dah a ni tawh a, a hmun tur erawh tihfel a la ni lo.