Lunglei PS sakna tur sumin Siaha PS sak ṭhat tum

Home minister R Lal­zirliana chuan, Lunglei Police Station sak ṭhat tumah dodalna a awm avangin a sakna tura sum ruahman chu Siaha Police Station sakna atan hman tum a nih thu House a hrilh.

MNF member K Sangṭhuama zawhna kal zelah R Lalzirliana chuan, Lunglei PS chu sa ṭha tura hmalak a nih thu sawiin, "A sakna tur pawisa pawh a awm vek tawh a, contractor pawh thlan fel vek tawh niin, ban ṭhenkhat phei chu phun a ni tawh. PS sak ṭhatna tur hmun hi a ṭhat avangin Lungleia tlawmngai pawl hrang hrang pawhin an awt hle a, a chhak deuha field awmna nen inthleng an dil a ni," a ti a; mipui tana ṭangkai tura hriat a nih avangin tlawmngai pawlte dilna chu pawm a nih thu a sawi.

Home Minister chuan, hmun an inthleng hnua an hmun neih tharah hma an lak dawnin dodâltu an awm leh tih sawiin, "A dodaltute hi sorkarin a hlauh vang ni loin, mipuite'n ṭangkai zawka an hman theih tura cheibâwl chu sorkarin ṭha a ti ta zawk a ni. Heti chung hian neitu nihna chu police kutah a awm tho ang. Lunglei PS sakna tur a hlawhchham takah chuan a sakna tur sum awm sa chu Siaha PS sak nan hman tum a ni ta zawk a ni," a ti.

HM Lalzirliana chuan, khaw tin deuh thaw aṭangin police outpost siamsak dilna an dawng tih sawiin, "Hei hi mipui­te'n police-ah rinna an nghah ngamzia tilangtu a nih avangin a lawmawm hle. Hetih lai hian, outpost thar siam tur hian post thar siam a ngai a ni," a ti a; outpost thar siam tun dinhmunah chuan tih theih a nih hrih loh thu a sawi.