Sorkarin doctor 26 a lak belh dawn

Health minister Lal Thanzara chuan, doctor indaih lohna phuhrûkna turin March 20 khan sor­karin doctor 26 lak thar a phalsak thu House a hrilh.

INC member Vanlalawmpuii Chawngthu zawhna chhangin Health Minister chuan, East Lungdar PHC-ah tun dinhmunah doctor dah vat theih a nih rih loh thu a sawi a, "Hetih lai hian, nimin khan Chief Minister-in medical officer post ruak 26 hnawhkhah min phalsak a ni. Hengte hi lak an nih hunah doctor indaih loh zual phuhrûk tum a ni ang," a ti.

Lal Thanzara chuan MNF member Lalrin­awm­a zawhna chhangin, tun dinhmunah Mizoram State Health Care Scheme hnuaiah chhungkaw 1,15,221 an inziah luh thu a sawi a, "Kum 2015-16 chhungin he scheme hnuaiah hian damlo 5,258 hnenah pawisa pek an ni," tiin, mi 5,258 tan Rs. 12,80,26,231 sên a nih thu a sawi.

MNF member Dr K Beichhua zawhna chhangin Health Minister chuan, Mizoram Health Care Society-in Aizawl Civil Hospital-ah hepatitis-C enkawlna tur man tláwm zawkin company-te inremna (MoU) ziahpui a nih thu a sawi a, "Health Care hnuaia in register damlo tan pawisa sen a ngai lo," a ti a; Health Care-a in register-te chu damdawi-in lamin Rs. 30,000 peksakin, anni hian an bill leh ṭhin thu a sawi.