Eptu MLA-te chhuah chhan sawifiah
MNF party chuan thuchhuah siamin, March 20, 2017-a Assembly budget session-a pass tak, Land Aquisition Bill chu eptu MLA-te'n pass pui tlaka an ngaih loh avangin pass a nih dawn laiin House chhuahsan tih an tarlang.
MNF tarlan danin, March 31, 2016-a Assembly session-ah ‘The Mizoram Land Acquisition, Rehabilitation and Resettlement Bill, 2016 pharh chu a ṭhat tâwk loh avangin, Select Committee member pasarih dina en zui tura dah a lo ni tawh a; chumi ang chuan Land Revenue & Settlement (LRS) Minister chairman-na hnuaiah uluk taka en zui a ni a, mithiamte pawh râwn a ni. Chumi hnuah April 21, 2016-ah Special Assembly koin pass a ni.
Dan thar chu hman mumal a la nih hmain, March 20, 2017-a budget session-ah Amendment Bill pahnih (Bill No-40 & 41) put luh a ni tih sawiin, MNF chuan, "Mipui zalenna rahbehna a ni," an ti.
Amendment Bill-ah Registration Act 1908 dan ngai loin inbiakremna anga kalpui mai tura rawtna chu Assembly-a eptu pawl, Mizoram Democratic Alliance (MDA) MLA-te chuan corruption kawngkhâr inhawnnaah an ngaih thu sawiin, "Mipui tana thil ṭha loah ngaia opposition MLA-te'n pawmpui duh loa House an chhuahsan kha tih âwm takah kan ngai," an ti a; eptu MLA-te chu an chhuan thu an sawi.
MNF chuan, Amendment Bill pahnih dan pakhat hnuaia ni khata put luh a ni mai hi thil awm ngai lo a ni a, Bill phuailuai tak mai Congress sorkarin Assembly House-ah a pu lut kha sokar inthlahdahzia lantirtuah kan ngai," an ti.