World Poetry Day hman a ni

Mizo Poetry Society (MIPOTY) leh Mizoram University-a Mizo department-te chuan, nimin khan Hrangbana College Golden Hall-ah World Poetry Day an hmang a, parliamentary secretary TT Zothansanga'n a hmanpui.

TT Zothansanga chuan, Mizote'n an kalna leh an tih lamah theihtawpa an beih a ngaih thu a sawi a; ṭhalai zingah social media ringawt buaipui a, thil tak tak ti peih lo an pung nia a hriat thu sawiin, "International thlenga mi sawm tham mithiam ni thei tura inbuatsaih a ṭul. Lehkhathiam tamna state ni ngawt loin, a taka chhawr tlak leh thiamna tak tak nei kan inchher a ngai a ni," a ti.

World Poetry Day hmanna inkhawm hi MIPOTY president Prof. RL Thanmawia'n a kaihruai a, secretary H Laldinmawia'n report a pe a; MIPOTY adviser leh MZU Mizo department-a HoD Prof. Laltluangliana Khiangte-in thu a sawi bawk.

Inkhawmah hian MIPOTY buatsaih, ṭhangthar hla phuah thiamte hla dahkhawmna lehkhabu 'Zaikung Thar' tih chu khuallian TT Zothansanga'n a tlangzarh. Lehkhabuah hian mi hrang hrang 48 phuah hla 217 telh a ni.