KHAWTHLIR

Mizoram Board of School Education (MBSE) chairman atan JH Zoremthanga, Kanan Veng dah a ni a, January 1, 2021 aṭangin a zawm ang. Hemi chungchangah hian School Education department chuan nimin khan notification a tichhuak a; MBSE chairman hna hi kum 6 chhung emaw, kum 65 tlin thleng (thleng hmasa zawk zawk) emaw a ni.

Champhaia Excise & Narcotics enforcement-te chuan November 26 khan Champhai Zote dáia Ṭiau kawngah heroin gram 84.800 (hawng 7) an man a, a neitua puh Liansianmuanga (36) s/o Thuamthangi, Champhai Dinthar Veng an man bawk. Excise & Narcotics department hian kumin chhungin heroin kg. 10 leh gram 386 an man tawh a, October 31 thleng khan ruihhlo kaihhnawihah mi 471 man tawhin, thubuai 353 an ziak lut tawh a ni.

Sports, Youth Affairs, Tourism & ICT Development Board chu nimin khan an chairman Robert Romawia Royte, minister of state hoin Secretariat conference hall-ah an ṭhu a; board hmanga department pathumte hmalakna leh hmachhawp an thlirho a; mamawh leh project ṭhenkhatte SEDP thuneitute hnenah thlen ni se, an ti.

Agricultural Technology Management Agency (ATMA)-in district hrang hranga loneitute hnena 'Farm Acts for Agriculture Reforms 2020' chungchang zirtirna a kalpui mekah, November 24, 2020 thleng khan loneitu mi 2,499 hnenah online training neih a ni tawh. Training hi November 30, 2020 thleng kalpui tur a ni.

State Referral Hospital-ah Covid-19 vei mi 31 enkawl mek an ni a, an zinga pahnih chu nimina dah luh an ni. SRH-ZMC Bulletin tarlan danin, nimin khan ICU-ah mi pakhat dah luh belh a ni a, pahnih an awm mek a, oxygen pek ve ve an ni. Hetih lai hian, Covid-19 vei enkawl mek zinga nu pakhat chuan November 26, Ningani zan khan fapa a hring a ni.