Bomb hmangin MLA-te'n sangha an man - Phaizau VC & NGO

Phaizau VC leh an khuaa pawl dang zawng zawng (all NGO)-te telna Joint Committee chuan nimin khan thuchhuah siamin, an bialtu MLA H Lalzirliana bakah Phaizau leh Mamita MNF hruaitute'n Tut luiah bomb hmangin sangha an man tih an tarlang a; dan an bawhchhiat avangin Phaizaua MNF unit hruaitute chu Rs. 10,000 cháwi turin an hriattir.

Phaizau Joint Committee chuan, Tut luia an ram chin chu khawtlangin an humhalh tih tarlangin, "Khawtlangin lui humhalh lai kan nei tih hre reng chungin Phaizau MNF hruaitute chuan kan bialtu MLA H Lalzirliana leh MNF Mamit Centre Block president H Lalthlengliana te sáwmin November 21, 2020 khan kan lui humhalh lai Saitlan lipui leh Vaak lipuite chu jeletine hmanga bomb in, sangha tam tham tak an man tih hriat a ni," an ti.

Phaizau VC leh all NGO chuan, Phaizau MNF unit hruaitute chu khawtlang dan bawhchhia an nih avangin Rs. 10,000 cháwi turin an hriattir tih sawiin, "Kan bialtu MLA hnenah ngei pawh kan lui humhalh chin chu min khawihsak lo tura kan ngen chung pawha min tih luihsak zel duh hi hriatthiam har kan ti a. Kan Bialtu MLA leh MNF Block hruaitute thil tih dan hi Phaizau khawtlang zah lohna leh min tham lohna lian tak niin kan hria," tiin an sawi.

Sorkar dan ding lai tlawhchhanin Tut luia an ram huam chin te, Ramri lui leh Saitlan lui inkar chinahte dynamo leh jeletine bomb hmanga sangha man an khap a, mipui hriatah vawi tam tak an puan chhuah tawh thu an tarlang bawk.