Ni hnih chhungin lirnghingin Mizoram vawi thum a sâwi
June 23, Thawhlehni zan tir lam leh zanlai hnaih tawh bakah, nimin zing khan Mizoramah lîr a nghing leh a, Mizoram khawchhak lam, Champhai district lamin an hria a, hmun dangah a sawi na vak lo. Heng lirnghingte hian thil tih chhiat a neih hriat a ni lo.
Tarlan tawh angin, June 21, Pathianni tlai dar 4 pelh hretah magnitude 5.1-a náin lîr a nghîng a, thil tihchhiat a neih hriat a ni lo.
June 22, Thawhṭanni zing dar 4:10-ah magnitude 5.5-a náin a nghing leh a, Champhai district-a khaw eng emaw zatah biak-in leh hall ṭhenkhat a tihchhiat bakah, mimal in eng emaw zat nasa lutuk loin a tichhia a ni.
National Centre of Seismology tarlan danin, June 23, Thawhlehni zan dar 7:17-ah magnitude 3.7-a náin lìr a nghîng a, a inṭanna (epicentre) chu Thenzawl bul vel a ni a; zan dar 11:03-ah magnitude 3.2-a náa nghing lehin, epicentre chu Champhai aṭanga chhimchhak lam km. 70 vela hlá a ni. Nimin zing dar 8:02 khan Champhai bul vela epicentre neiin magnitude 4.1-a náin a nghîng leh bawk.
National Centre of Seismology-in a chhinchhiahte bakah hian Thawhlehni zan khan Champhai district lam mipuite chuan ṭum eng emaw zat lirnghingin a sâwi niin an hria a, hei vang hian khaw hrang hrangah chhungkaw eng emaw zat chu an inah riak ngam loin, khawlaiahte an riak a ni.
Mizorama lirnghingte hi zir chiang turin Mizoram University (MZU) chuan member pali awmna study team-te Mizoram khawchhak lamah a tîr a; team member - Dr Saitluanga Sailo (HoD, Geology, PUC), Dr V Vanthangliana (PUC), Dr J Malsawma (MZU) leh Dr Paul Lalnuntluanga (MZU)-te chuan Thawhlehni khan Farkawn an thleng a, Farkawnah an riak.
MZU study team hian nimin khan Tuipuirala khaw hrang hrang an tlawh kual a, Zokhawthar thlengin an kal. Team member Dr V Vanthangliana chuan, lirnghing kaihhnawih leh a sûlhnu thil chi hrang hrang enfiah (assess) tura kal an nih thu a sawi a; lirnghing tehna leh chhinchhiahna hmunpui lamin epicentre a record leh a taka a awm dan te, lirnghing insâwi dan te, mipui a nghawng dante leh a kaihhnawih thil chi hrang hrang zir chiang tura kal an nih thu Vanglaini a hrilh.
Dr V Vanthangliana chuan zawhna chhangin, National Centre of Seismology-in a chhinchhiah phâk chiah loha lirnghing a awm theih thu a sawi a, "A bikin, magnitude 2.0 aia hniam lamah chuan lìrnghìnna hmun azirin wave-in a thlen phâk loh a awm thei a, chutih laiin, a nghìnna hmunah chuan lei a che ve ngei a, a huam chhunga mite pawhin an feel (hriat) theih a awm thei a ni," a ti.
Geology and Mineral Resources (GMR) director Lalṭhazuala chuan, Mizoram khawchhak lama lirnghing dinhmun leh a sûlhnute enfiaha zir chiang turin nimin khan GMR joint director H Lalbiakkima leh GMR staff dangte'n nimin khan Champhai lam an pan thu a sawi.
GMR Director chuan, an department hotute chuan Khawbung tlangdung khuate chu Champhai thlengin an tlawh dawn tih a sawi a, "Tunah chuan chanchin sawi theih vak a la awm lo. Mipuite erawh thlabárin awm lo se. Chîâi lo leh fím taka awm turin chhungkaw tinte kan chah a, rîkrum thila pan mai theih turin hmun him lai turte inkawhhmuh a ngai a ni," a ti.