Covid-19 vangin special session koh a ngaihna awm rih lo - Speaker

Legislative Assembly speaker Lalrinliana Sailo chuan, Covid-19 avangin Assembly special session koh a ngaihna a awm loh thu a sawi a, "Session hun pangngaiah session hi koh a ni ang," a ti.

Vanglaini palai zawhna chhangin Speaker chuan, "Kan Chief Minister sawi kha a dik a, session hi ko ila, kori a tukna tur a awm chuang lo. Session hnuhnung ber aṭanga thla ruk hmaa session hi neih leh ṭhin tur a ni. Chuvangin, August thla tàwp emaw, September tìr lamah emaw kan neih ka ring," a ti a; special session neih phût an awm chungchangah Chief Minister nen pawh an inràwn thu a sawi.

Lalrinliana Sailo chuan, tu state tan mah state sum hmuh tur dik tak hriat theih a ni lo tih sawiin, "India ram sum dinhmun hi GST a luh ṭhat loh avangin a buai nuai a ni ber. Chuvangin, tute state tan mah kan sum hmuh tur a chiah chiahin a sawi theih loh," a ti.

Ramin harsatna a tawh chuan MLA-te chu che hmasa tur an nih thu sawiin Speaker chuan, "Covid-19 dona atana party hrang hrang MLA-te'n an hlawh leh an fund an thawh hi a lawmawm ka tiin ropui ka ti tak zet," a ti a; tun ang baka MLA-te'n mipui hma an hruai a ngaihna hun a awm chuan loh thu a sawi.