January-September, 2020 chhungin Mizoramah TB vangin mi 37 an thi

Kumin January aṭanga September thla thlengin Tuberculosis (TB) vangin Mizoramah mi 37 an thi a, nikuma TB vanga thi zat mi 29 aiin mi pariatin thi an tam tawh.

National TB Elimination Programme (NTIP), Mizoram chhinchhiah danin, kumin January-September chhungin Mizoramah TB vei mi 1,996 hmuh chhuah a ni tawh a, mi 37-in an thihpui tawh. TB vang hian kum 2019-ah mi 29 leh 2018-ah mi 24 an thi a, kuminah TB vanga thi an pung a ni.

TB vei hmuh mi 1,996 zinga mi 189 chu HIV positive an ni tih hmuh chhuah a ni a, mi 139 chu TB pangngai aia tihdam harsa zawk MDR-TB vei an ni. Nikum chhung khan MDR-TB vei mi 132 hmuh chhuah an ni a, kum 2018-ah mi 104 hmuh chhuah a ni bawk.

NTEP, Mizoram chuan, taksa khawi lai pawh a TB theih avangin, natna hriat chhuah vat a, enkawl vat a pawimawh tih an tarlang a, "Tunlaiin hri léng avangin inentirna kawngah mi tam takin harsatna an tâwk a ni. TB vei leh TB vanga thi an pun reng avangin TB inentirna kawngah mipuite an harh thar a ngai tak zet," an ti.