Eptu MLA-te House aṭangin an chhuak ; Dy. Speaker kaihhruaina hnuaiah House-a thut an tum tawh lo

Nimina Assembly budget session-ah eptu MLA-te chu inkhawm kaihruaitu deputy speaker R Lalrinawma laka an lungawi loh avangin House aṭangin an chhuak a; deputy speaker kaihhruaina hnuaiah chuan Assembly House-ah ṭhut an tum tawh lo.

Minister pahnih, Zodintluanga leh John Rotluangliana te demand-te chu nimin session-ah sawiho a ni a; rulling member pahnih leh opposition member pahnih ve vein thu an sawi hnuah chhun dar 12:40 velah Deputy Speaker chuan demand sawihona hun a titawp. Deputy Speaker thil tih dan chu duh loin eptu MLA-te chuan Assembly House an chhuahsan nghal a ni.

Eptu MLA-te hian Mizo Hnam Runah thuthar thehdarhtute an kâwm nghal a; MNF member Dr K Beichhua chuan, "Demand sawi turin kan inkian kual deuh a, sawi duh ṭheuh kan ni. Hei hi hun dang pawha kan kalphung pangngai a ni. Deputy Speaker hian ‘Sawi tur in awm loh chuan ka titawp mai dawn,’ a ti a, Lalrinawma chuan bán a phar a, ‘Ka hmu lo' tih chhuanlamin Minister chu ‘wind-up’ turin a ko lui a ni," a ti.

Dr K Beichhua chuan, Lalrinawma'n bán a phar ngei thu sawiin, "Kei pawh ka ding chhuak a, Lalrinawma bán phar ngei thu hi ka sawi a, Dy. Speaker hian a ngai pawimawh ta chuang lo a ni," a ti a; Dy. Speaker chêt dan chu Assembly House palzûtna leh zah lohnaa an ngaih thu a sawi.

December 2016-a Assembly session-ah deputy speaker R Lalrinawma'n Lalruat­kima ṭawngkam mawi lo takin House

aṭanga hnawhchhuaha a lo vau tawh thu sawiin Dr. Beichhua chuan, "Deputy Speaker kaihhruaina hnuaiah hian March 30 thlenga Assembly budget session neih turah eptu MLA-te chu tel zui kan tum tawh lo," a ti.

Lalrinawma pawhin bán a phar ngei thu sawiin, "Bán ka phar ngei a, ka bán phar kha a hmu lo nge ni, ka phar tih ka hrilh pawha Dy. Speaker-in a hmuh loh vanga demand sawihona hun a titawp mai hi hriatthiam a har. Sawi tur ka ngahin ka inbuatsaih nasa ve hle," a ti a; tun hma lamin inhriatthiamna tel loa session kaihhruai a la hriat ngai loh thu a sawi.

Lalruatkima pawhin Dy. Speaker-in demand sawihona a tihtawp lai chu páwn lama a chhuah lawk hlàn a nih thu sawiin, "Session dang ang thoin sawi hmasa tur kan inphût kual deuh. Darkar chanve chauh demand sawihona a hawng duh hi a vanduaithlak a, session dangahte chuan zan tlai tak thlenga sawiho a ni fo. Mipui hnuk khawih phak a nih avangin, hetia sawihona hun a khâr mai hi kan hrethiam lo khawp mai," a ti.

Lalruatkima chuan, minister pahnih demand sawihonaah hian buhfai harsatna te, gas chungchang te, tourist lodge mimal kuta pek a nih dan te, Housing for All chungchangah screening tel loa veng tina Congress party mi leh sa 10 an thlan dante leh Kolasib-ah RCC building neite in sak ṭanpuina pek an tum dante sawi chhuah tuma a inbuatsaih thu a sawi.

Opposition group leader Vanlalzawma chuan, "Hetianga mipui aiawhte'n an aiawhte tana an thil tih theih sang ber pakhat, department pawimawh tak tak, minister pahnih demand sawihona Dy. Speaker-in a titawp mai hi democracy principle palzûtna niin a lang. Opposition MLA-te a thamlohna leh palzûtnaah kan ngai bawk," a ti.

Vanlalzawma hi meeting-a telna tur a neih avangin demand a tir lamah a sawi a, eptu MLA-te House aṭanga an chhuah lai hian House-ah a awm lo a ni.