PRISM-in 2018 inthlanah hmalak an rêl

PRISM chuan nimin khan Chanmari YMA Hall, Aizawlah inkhawmpui lian vawi 12-na an hmang a; Mizoramah rorelna dik leh sorkar ṭha a awm theih nan kum 2018 Assembly inthlanah hmalak an rêl.

PRISM inkhawmpui hi chawhma lamah an vice president K. Tlanthanga'n a kaihruai a, Prism president Vanlalruata bakah Revd. Chuauṭhuama, Dr. H. Lallungmuana, Rev. Dr. K. Thanzauva, Rev. R. Vanlalawiaten thu an sawi.

Chawhnu lamah an president Vanlalruata kaihhruaiin rorel a ni a, agenda pathum an nei. 'Mizoramin ram rorelna dik leh sorkar ṭha kan neih theih nan kum 2018 MLA inthlanpuiah PRISM-in hma la rawh se,' an ti. An rorel tihhlawhtlinna tura hmalak dan tur (Action Plan 2017-18)-te April 2017 ral hmaa siamfel an rêl a; regional organ tin leh member tinin general headquarters hmalakna atan thawhlawm thawh ṭheuh ni se, an ti bawk.

Chawhma lama inkhawmah PRISM President chuan, kum 2018-a MLA in­thlana sorkar thar neih turah Mizoram ram kal zel dan tur a innghat tih sawiin, "Kan duh loh dana kal mek leh kal zel tur chiang sa kutah kan innghat dawn nge, siamṭha turin ke kan pên dawn," a ti.

Vanlalruata chuan, politics kal dan siamṭha tur te, rorelna dik leh sorkar ṭha, ram leh hnam humhalh ngam, ṭhalai leh ṭhangtharte chhawr tham, sorkar ruhrel leh inawpna siamṭha ngam, dan zâwma dik taka lekkawh ngam, eirûk hmang hrem ngam, mipui hamṭhatna pe thei, hmasawnna ruhrel din thei leh sumdawnna awmze neia kalpui thei sorkar a din theih nana ngaihtuahna sêng turin mipui a chah a; eirukna do kawnga thawhhopuiah mipui a sáwm.

PRISM vice president Dr H Lallungmuana chuan, Mizoram kaihruai tawhtute'n ram leh mipui an thlenpui chin chu a lungawithlak loh niin a sawi a; "Kan ram ei chhetu 'Corrution Goliatha' vawm thlu ngam tur Davida ang kha kan mamawh. Kut fai leh thinlung thianghlim nei a, bum tuma chhe­chham ngai lo mi thar rual kan ram hian a mamawh ni," a ti.

Revd Chuauṭhuama chuan, “Kan ram dinhmun ngaihtuah hian a châng chuan a beidawnthlák ṭhin. Kan ram hian hero a mamawh. Kristiante phei chuan Bible-ah model duhawm tak tak kan nei a, kan model ropui ber chu Isua ni reng se. Chumi bakah chuan Mizote'n model tûr, hero i chher chhuak teh ang u," a ti a; Mizoramin mi dik leh fel, ram hmangaihtu dik tak, hna thawh thiam a mamawh tih a sawi.

Rev.Dr K Thanzauva chuan, Mizote chu sum bâwihah an táng nia sawiin, "Kum 2018 inthlanah hian jubilee dár i tum ang u. Moneycracy sal aṭanga chhuakin, khawvel hian mak tiin Lalpa ropuizia a hmu dawn a ni," a ti.

Rev. R Vanlalawia pawhin, "Kan ramah hian a der ni lo, a tak taka ram leh hnam vei, mutmawh hnàrmawha neia ram siam ṭhat duh tak tak mi a mamawh a ni," a ti bawk.

PRISM inkhawmpuiah hian general secretary C Lalsawmliana'n PRISM hmalak tawhnate a sawi a, treasurer HK Liansawta'n sum dinhmun a sawi thung.