NLUP hmang ṭha lo an awm - CM Thar chhuah zat a la hriat theih loh

NLUP ṭanpuina dawngtute'n NLUP hmanga an hnathwh aṭangin an thar chhuah zat hriat theih a la ni lo. Hetih lai hian, chief minister Lal Thanhawla chuan, NLUP chu a ṭhat anga hmang ṭha lo a dawngtute zingah an awm thu a sawi.

INC member John Siamkunga zawhna kal zelah Chief Minister chuan, NLUP dawngtute zingah an hlawhchham vanga chawlhsan te, mimal hmalakna NLUP hnuaia hmalakna anga tarlan te, trade thlak te, an thlan loh trade pekte an awm avangin NLUP dawng zat a danglam reng thu a sawi a, "NLUP hi a ṭhat anga hmang ṭha lo an awm. Mahni tuina záwng hre mang lo, pawisa tamna ngawt thlang, ti ṭha peih lote an awm ṭhin," a ti.

Lal Thanhawla chuan, Soil & Water Conservation department hnuai­ah NLUP dawngtu, hmunphiah trade-ah mi 8,364, ṭhelrêtah mi 1,433 leh coffee-ah mi 1,642 an awm thu sawiin, "Kum 2012-2017 chhunga Soil & Water Conservation department hnuaia NLUP beneficiary-te hnena sum pek chhuah tawh zat chu cheng nuai 9068.30 a ni," a ti a; ṭhelret leh coffee chu thar chhuah a la nih loh thu leh, hmunphiah chu qtl. 3,50,417.34 thar chhuah a nih tawh thu a sawi.

Agriculture minister R Lalzir­liana chuan Lalruatkima zawhna chhangin, NLUP line department hrang hrang land base leh industry leh a kaihnnawih lam aṭangtea thar chhuah chhût mek a nih thu a sawi a, "Impact analysis form hmangin district tin aṭangin khawn khawm mek a ni. Assesment tih zawh hunah thar chhuah zat leh a hlut zawng a hriat theih ang," a ti.

Agriculture Minister sawi danin, NLUP hnuaiah Marketing Cell din a ni tawh a, anni hian NLUP aṭanga thar chhuahte man man zawka hralh a nih theihna atan 'Concept Note for Marketting of NLUP Product' an buatsaih. UNO leh Mizoram sorkar thawhhona hnuaiah UNDP-in expert consultancy firm an ruai bawk a, report an thehlut tawh. UNDP hnuaiah vek market task force din a ni a, thlai pawimawh bik atana zir chianna leh a hralhna ṭha zawk an kalpui mek a ni.

Lalruatkima'n Maketing Cell tihtawp ni tawha a hriat thu a sawi chungchanga R Lalzirliana chuan, "Marketing Cell hian an tih tur an ti zo tawh a ni mai thei. Concept note an siam tawh a, ngaihtuah mek a ni," a ti.