Raw chi supply tur thlan fel a la ni lo

Horticulture department chuan mau/rua chî supply-tu tur an la thlang fel lo. Mau chi supply-na atan hian June 3, 2020 khan Horticulture department chuan short tender notice a chhuah a, mi pakhatin a chháng a ni.

Vanglaini palai zawhna chhangin Horticulture secretary JC Ramthanga chuan, mau/rua supply-tu tur an la thlan fel lo thu a sawi a, "Uluk tak leh fimkhur takin thil kan kalpui a, kan zir chiang mek a ni," a ti.

JC Ramthanga chuan, mau chi supply chu langtlang takin kalpui a nih thu sawiin, "Tender-te pawh chanchinbuah chhuah a nih bakah, department website-ah pawh târ chhuah a ni," a ti a; mau chi supply chungchangah zêp tur a awm loh thu a sawi.

Tarlan tawh angin, mau/rua chî supply tura tender koh hi mi pakhat chiahin a chháng a, June 16 leh 17 khan chhanna enfiah niin, mi pakhatin a chhànna chu pawm tlakah ngaih a ni.

Tender chhànna hi Horticulture depart­ment chuan an department Secretariat lamah an thawn a, Departmental Purchase Board-in an enfiah hnuah mau chi supply-tu tur chu thlan a ni ang.