Khawtlang enkawl sikul 62 a awm

School Education minister H Rohluna chuan, Mizoramah khaw­tlang/kohhran sikul, sorkarin a puih (lumpsum grant in aided school) middle section-ah 35 leh high school section-ah 27, a vaiin 62 a awm thu MNF member Lalruatkima zawhna chhangin House a hrilh.

H Rohluna tarlan danin, Lumpsum grant in aided middle school 35 zingah hian sikul 20 chu khawtlang enkawl a ni a, sikul 15 chu kohhran enkawl a ni. Lumpsum grant in aided high school 27 zingah kohhran enkawl pali leh khawtlang enkawl 23 a awm thung.

Lumpsum grant in aided school-te hi kum tin Rs. 1,20,000 ṭheuh pek an ni a, tun dinhmunah chuan sorkarin dinhmun ṭha zawka hlânkai tumna a nei lo.

MPC member Lal­thanliana zawhna chhang­in School Education Mi­nister chuan, kum 1980 hnu lama sorkarin a rawih aided teacher 35, non-formal teacher 10, primary school teacher 51 leh middle school teacher 79-te chu dah ngheh an nih theihna atan sorkarin hma a lak mek thu a sawi.

H Rohluna chuan, aided teacher 35 leh non-formal teacher 10-te dah nghet turin recruitment rules (RR) thlahdul deuh a ṭul thu a sawi a, "Lak an nih laia qualification leh RR thara qualification a inang tawh lo," a ti.

School Education Minister chuan, RR thlahdul deuh chu DPAR-ah an dil tih sawiin, "RR relax hnuah pawh qualification-a pha lo an awm a, qualify 29 an awm a ni," a ti a; mi 29-te dah nghet turin hmalak mek a nih thu a sawi.