Congress party President-in thawhpuiah A sáwm niin ZNP President-in a sawi
ZNP president Lalduhoma chuan nimin khan Lunglei Press Club-ah thuthar thehdarhtute a kâwm a; kum 2018 Assembly inthlanpuiah Mizoram mipuite'n Bible keu chunga vote thlakna tur an ngaihtuah a ṭul tih a sawi. Chief minister ni lai Lal Thanhawla'n kum 2018 inthlanah ZNP chu thawhpuiah a sáwm niin a sawi bawk.
Lalduhoma chuan, Mizoramah MNF leh Congress party-te'n kum 33 chhung thuneihna an chan chhungin ram mipuite an hriselin an dam em tih chhût ngun a ngaih thu sawiin, "Pathian thu zâwm lote chunga ànchhia a awm angin, zu leh drug vang mai ni lo, eirûkna leh rilru dik lohna vangin Mizoramin ànchhia a dawng mek. Hei hi Congress sorkar hian a tawng baw mek a ni," a ti.
Mizorama politician zingah kohhran upa awm ṭeuh mah se, ram dinhmunin sàn lam aiin hniam lam a pan zel nia sawiin, Duhoma chuan, "Mi piangthar leh rawngbawltute'n kan zui turte kan ngaihtuah chiang a ngai," a ti a; sorkar laipui châwmhlawm nih reng chu thil zahthlak a nih thu a sawi.
ZNP President chuan zawhna chhangin, an party chu Congress party president Lal Thanhawla'n kum 2018 inthlana thawhpuiah a sáwm nia sawiin, ZNP kalphung leh duh dana an kal a nih chuan thawhpui an hreh loh thu a hrilh niin a sawi. "Congress ni lo, MNF ni lo, Mizoram siam ṭhat duhtute chu ka thawhpui thei vek," a ti a; lalna hrim hrim an khelh lo a, ram siam ṭhat duhtute nena thawhho a duh thu a sawi a ni.
Zawhna chhangin Lalduhoma chuan, March 27, 2017 khian ZNP High Command-in an zir chiang dawn tih a sawi a, "A chhiah cheng vbc. 51 vel îta ni tina kan ram sum tam tak phai lama a luang lut mek hi a uihawm thlâwt. Chu bakah, zu vanga nunna kan hloh tawh hi a tam lutuk a, a rapthlak hle a ni," a ti.
ZNP President chuan, Finance Minister-in kum 2017-18 Mizoram budget a pharh chu vote zawnna budget a nih thu a sawi a, "NLUP-ah cheng vbc. 2500 chuang an sem tawh chungin Mizoram economy-in sàn lam a pan thei chuang lo a, NLUP an sem vang hian mipui náwlpui hmasawnna tur chu thlawh khûma awmin, BPL an pung tual tual thung a ni," a ti.
ZNP chuan, an president Lalduhoma hian nimin khan Lungleia ZNP pisaah an party zawm thar voter 71 a lawm lut niin an tarlang.