Congress-in budget chhuanawm an ti

Congress party chuan thuchhuah siamin, Finance minister Lalsawta'n kum 2017-18 atana Mizoram budget a pharh tak chu chhuanawm an tih thu an tarlang a; Mizoram budget awm tawh zawng zawnga la ṭha bera an ngaih thu an sawi.

MPCC chuan, "Central sorkarin state-te hnena a sum pek dan kalphung a tihdanglam hnua mahni duh thála Mizoram sorkin plan leh non-plan awm loa budget a ruahman hmasak ber hi kan CM sawi tawh angin, Mizoram budget awm tawh zawng zawnga la ṭha berah kan ngai," an ti a; mipui mamawh hawi zawnga Finance Minister-in a duang chhuak nia sawiin, an fak.

Congress party chuan, Assembly House-a budget sawi ve pha lote'n an thiam

dan záwnga Mizoram budget, 'Ram hmangaihna aiin vote zawnna (election oriented budget) a ni,' an ti chu an ngaihtuah chiang lo hlea an ngai tih an sawi a, "Vote zawnna ni loin, mipui tana ṭha tur ngaihtuahna leh dah pawimawh berna aṭanga budget hi siam a ni. Budget ṭha leh chhenfakawm a nihna chu mipuite'n a hunah an la lantir turah kan ngai," an ti.

MPCC chuan, kum 2016-17 budget aia 9.51% laia tam budget leh kawngpui chei ṭhatna tura sum vbc. 239.50 (kum hmasa aia 259%-a tam) dah a ni te, kawngpui siam mek chhunzawmna leh a thar siamna tur vbc. 657.64 dahte leh police TA tur kum hmasa aia nuai 218.50 leh uniform leina tur nuai 340-a tam dahte chu sorkarin mipuite hamṭhatna tur liau liaua a tih a nih thu an sawi a; NEDP atana vbc. 750 dah a ni chu ram leh mipui hmasawnna tur liau liau a nih thu an sawi bawk.