Hmasawnna vei lohah sorkar puh

MPC party ṭhalaite chuan thuchhuah siamin, Finance Minister-in kum 2017-18 atana Mizoram budget a pharh tâkah kawlphetha siam chhuah nana tuikhuahna tur sum dah a ni lo niin an tarlang a; vanduaithlak an tih thu leh Congress sorkarin hmasawnna a vei lohzia lannaa an ngaih thu an sawi.

MPCY chuan, India rama state hrang hrangte anmahni state tihchangtlun nan kawlphetha hnianghnâra neih tumin an intlansiak mup tih sawiin, "India hmarchhak state hrang hrangte pawhin kawlphetha chakna hmanga state hausa leh intohdelh nih tumin hmalakna chak takin an kalpui a ni," an ti a; hmarchhak state dangte'n kawlphetha siam chhuahna tura hmalakna an neih hrang hrangte an tarlang.

MPCY chuan, Brig. T Sailo kaihhruai PC sorkarin hydel power project a buaipuite kha Congress leh MNF sorkarte'n chhunzawm se chuan, Mizoram chu a ṭhenawm state-te aia kawlphethaa a chungnung zawk tawh tura an ngaih thu an sawi a, "Kum 30 chhunga kan sorkar hrawnin a zir loh avangin special category state zinga hnufual ber leh buaipuiawm ber kan la ni hi a mualphothlak kan ti," an ti.