RGGVY-ah hnathawh a chak lo - Chief Minister

Power & Electricity department changtu, chief minister Lal Thanhawla chuan, Rajiv Gandhi Grameen Vidyutikaran Yojana (RGGVY) hnuaia contractor-te'n hna an thawk chak lo hle niin House a hrilh.

MNF member Lalrinawma zawhna chhangin Chief Minister chuan, RGGVY hnuaiah Mizorama khaw 175-ah electrification hna thawh a ni tih a sawi a, "Tun dinhmunah contractor-te'n khaw 153 department kutah an hlan tawh. Khaw 22-ah hna thawh zawh a la ni lo," a ti.

Chief Minister sawi danin, contractor hi kum 2008 aṭanga thlan a ni a, hna an thawh chak loh avangin department hotute chu nawr tura tih reng an ni. Khawtlang hruaitute'n an lo thawpui ṭhat lohnate awm mah se, a tlangpuiin an thawk chak lo hrim hrim a ni.

RGGVY hnuaiah hian BPL chhungkua 26,210-te chu electric free connection pek an ni.