Aizawla Vishal Mega Mart hawn tur Sumdawng pawl MIMA-in an duh lo

Sumdawnna lama India ram hmun hrang hranga inzar pharh Vishal Mega Mart chuan Bawngkawn, Aizawlah dawr thar hawn tumin an inbuatsaih mek a; chutih laiin, Mizoram Merchant Association (MIMA) chuan Aizawla Vishal Mega Mart awm tur chu sum­dawnnaa Mizote chîm­ralna turah ngaiin, ṭha an tih loh thu an puang.

Nimin khan MIMA hruaitute'n Aizawl Press Club-ah thuthar thehdarhtute an kâwm a; MIMA president PC Laldinthara chuan, Vishal dawr chu Bawngkawna LRM Building-ah dawr hawn tumin an inbuatsaih tih a sawi a, "Vishal hi a lo luh tawh chuan hnam dang tan Mizorama sumdawnna kawng zau tak hawnna bul dik tak a ni ang tih kan ring tlat a ni," a ti.

MIMA President sawi danin, Vishal dawr hi hawn mai theih a ni tawh a, thawktu Mizo ṭhalai tam tak la tawhin, Silchar-ah an training tir mek a ni. Vishal hian India rama khawpui 139-ah dawr 189 an nei tawh. Bawngkawna an dawr siam thar chu LRM Building neitute'n an an hminga kalpui a nih thu an sawi a ni.

MIMA President chuan, hnam dang sumdawng liante Mizorama an lo luha sumdawnna an rawn kalpui chuan, Mizorama ram leilung fate chîmralna tura an ngaih thu a sawi a, "Economic assimilation chu Mizote'n kan hmabak a ni ngei dawn a ni," a ti.

Hetih lai hian, MIMA hruaitute chuan, Aizawla Vishal dawr dintu hming chu Mizo a nih thu an sawi a; Vishal dawr dintu tak an hriat chian loh thu an sawi bawk.