IR police-te hnuh kîr loh ngen

YMA, Serlui Group chuan thuchhuah siamin, tun hnaia Assam leh Mizoram ramri buai vanga Vairengte leh Saihapui-V khuaa Mizo IR police dahte chu hnûk kîr lo turin Mizoram sorkar an ngen.

Serlui Group YMA chuan, an group huam chhung ramri dep khuaa mipui leh ṭhalaite Mizoram humhalh nan huaisen tak leh nasa taka hma an laknate ropui an tih thu an tarlang a, "Mipui thlamuan tur leh kan ram venhimna tura Mizoram sorkarin Vairengte leh Saihapui V-a IR police a dahte hi hnûk kîr loin dah ngheh an nih theihna tura hma la turin kan ngen a ni," an ti.

Saihapui-V khuaah hian ILP checkgate dah a nih theih nan hma la tura Mizoram sorkar ngenin Serlui Group YMA chuan, "Ramri chungchangah kan group huam chhunga khaw mipuite hriatpuina ni loin NGO dangin mahnia hmalak loh ni se kan ti," an ti a; sorkarin ramri dep khuate hmasawnna turin chak takin hma la se an duh thu an tarlang bawk.