Kawng siam buaipuitu board-te'n Rs. 49,58,106 an hmang tawh

Mizoram sorkarin board a din zinga mi, Bamboo Link Road Board leh Road & Infrastructure Development Board chuan kum hnih chhungin sorkar aṭangin Rs. 69,65,300 an dawng tawh a, Rs. 49,58,106 an hmang tawh. Bamboo Link Road Board chuan mau/rua chìn theihna hmun tur an la tlawh lo a, hmalakna dang pawh an la siam thei lo.

RTI Act hmanga zawhna PWD SPIO-in a chhàn danin, Bamboo Link Road Board hian kum 2019-20 leh 2020-21 chhungin hna thawhna atan sorkar aṭangin Rs. 34,82,650 an dawng tawh a, Rs. 24,89,030 hmang tawhin, October 31, 2020 thleng khan Rs. 9,93,620 an la nei.

Road & Infrastructure Development Board chuan kum 2019-20 leh 2020-21 chhungin hna thawhna atan Rs. 34,82,650 an dawng tawh a, Rs. 24,69,076 hmang tawhin, October 31, 2020 thleng khan Rs. 10,13,574 an la nei a ni.

Bamboo Link Road Board hmalaknain NITI Aayog-ah cheng vbc. 5,470 hu concept paper  thehluh a ni tawh. Potential area identification sub-committee pahnih - North Mizoram leh South Mizoram din a ni tawh a; sub-committee hian an huam chhunga raw chìn theihna hmun tur zawngin, DPR siam tura tih an ni.

North Mizoram sub-committee-ah Aizawl, Champhai, Kolasib, Mamit, Saitual leh Khawzawl district-te a awm a; South Mizoram-ah Lunglei, Siaha, Serchhip, Lawngtlai leh Hnahthial district-te a awm.

Sub-committee pahnih hian raw chìn theihna hmun tur an la tlawh thei lo a, hmalak mumal a la awm lo. Hma an lak loh chhan chu, Covid-19 lockdown vang niin an tarlang. Bamboo Link Road Board hi a tìrah committee anga din a ni a, May 4, 2019 khan board tia thlak a ni. Board din a nih hnuah ṭum thum an ṭhukhawm tawh.

Road & Infrastructure Development Board pawh a tira committee tih chu May 21, 2019-ah board tia thlak a ni. Lockdown vangin an tum angin hma an la thei lo a; board din a nih hnuah ṭum nga an ṭhukhawm tawh a ni.

RID Board-ah hian sub-committee pathum - Monitoring & Evaluation Sub-Committee (team 2), Project Sub-Committee leh Decadal Plan Sub-Committee din a ni a; fûr laia national highway enkawl dan turte ngaihtuahpuiin, NHIDCL leh an contractor-te vawi hnih an ṭhutkhawmpui tawh.