Mizorama Covid-19 vei mi 145 zinga Mi 61 (42.07%)-in an vei tawh lo

Nimin khan Covid-19 hripui vei enkawl dam tawh mi panga chuan enkawl an nihna hmun an chhuahsan. Hripui vei hmuh chhuah tawh mi 145 zinga mi 61 chuan an vei tawh lo (negative) tih finfiah a ni tawh a, vei zat 

aṭangin 42.07% a tling.

Hetih lai hian, June 23, Thawhlehnia Zoram Medical College (ZMC) laboratory-a swab sample endik zinga mi pathumin Covid-19 an vei tih hmuh chhuah a ni.

ZMC laboratory-ah Thawhlehni khan State Referral Hospital (SRH) leh district pasarih - Aizawl, Lunglei, Siaha, Champhai, Kolasib, Serchhip leh Mamit aṭanga sample an dawn 620 (mipa 330 leh hmeichhia 290) endik a ni a, hripui vei mi pathum hmuh chhuah a nih laiin, mi dang 617-te chuan hripui an vei lo.

Thawhlehnia Covid-19 vei hmuh chhuahte chu Aizawl district mi pahnih leh Lunglei district mi pakhat niin, mipa pakhat leh hmeichhia pahnih an ni a; mi pahnih chu Delhi aṭanga haw an nih laiin, pakhat chu Mizoram chhunga awm niin hripui vei tawh midang hnen aṭanga kai nia hriat a ni. Covid-19 vei hmuh thar zinga pahnih, Aizawl district-a mite chu nimin khan SRH-ah dah luh nghal an ni.

Nimin khan ZMC labo-ratory-ah mi eng emaw zatte swab sample endik leh a ni a, vawiinah result a hriat ang.

Hetih lai hian, Lunglei Civil Hospital (LCH) laboratory-a TrueNAT hmanga swab sample endik zinga mi pahnih, Covid-19 vei anga hmuhte chu June 23 khan ZMC-ah finfiah nan endik a ni a, pakhat chuan Covid-19 a vei ngei tih finfiah a nih laiin, pakhat erawh chuan a kai lo tih hmuh a ni thung.

Nimin chhun khan Champhai district mi pali, Covid-19 vei, June 18, 2020-a hripui vei tawh lo (negative) tih finfiahte chu enkawl an nihna Designated Covid Health Centre (DCHC) - Nursing School aṭangin chhuahtir an ni a; anni hi recovery ward-ah enkawl an ni. Nimin chawhnu lam khan SRH-a enkawl Covid-19 vei tawh lo pakhat chu damdawi-in aṭangin chhuahtir a ni bawk.

Mizorama Covid-19 vei hmuh chhuah tawh zawng zawng chu mi 145 an ni a, an zinga mi 61 chuan hripui an vei tawh lo tih hmuh chhuah a ni tawh. Covid-19 vei tawh lo mi 61 zinga mi 24-te chu damdawi-in/DCHC aṭangin an chhuak tawh a, mi dang 37-te chu an la chhuak lo thung.

SRH-ZMC-ah Covid-19  vei mek 84 zinga mi 31-te enkawl mek an ni a, mi dangte chu an awmna district ṭheuha DCHC leh Covid Care Centre (CCC)-ahte enkawl an ni.

SRH-a hripui vei enkawl mekte chu mipa pasarih leh hmeichhia 24 niin, kum 22-57 inkar an ni a; Aizawl district mi 24, Kolasib district mi pali, Saitual district mi pahnih leh Serchhip district mi pakhat an ni. An vaiin Isolation Ward-ah an awm a, harsatna lian nei an awm loh thu, SRH-ZMC Bulletin chuan a tarlang.