Lawngtlaiah partial lockdown puan a ni Partial lockdown chungin inthlang dawn

Lawngtlai Bawrhsap chuan December 1-5, 2020 chhungin Lawngtlai khawpuiah partial lockdown a nih dawn thu a puang. Lawngtlai district-ah hian December 4-ah LADC MDC inthlan buatsaih tur a ni a, inthlan ní hi partial lockdown hian a huam dawn.

Sorkar thuchhuah tarlan danin, tun hnaiah Lawngtlai district-ah Covid-19 vei hmuh chhuah belh zel a nih avang leh mipui vantlang zinga hri darh zel tur vên nan leh contact tracing leh swab test chak zawka tih a nih theih nan Disaster Management Act, 2005 tlawhchhana puan a ni a; inkaihhruaina tihchhuah nghal a ni.

Lawngtlai khawpui chhunga khaw dang mi khualzin chám mek, mahni khaw lama haw turte chu vawiin November 30 zan dar 8 hmaa Lawngtlai chhuahsan tura tih an ni a; partial lockdown kalpui a nih tawh chuan chhuah phal a ni dawn lo. Sorkar leh village task force-te'n phalna an pekte ni lo chu Lawngtlaia luh phal a ni lo bawk ang. Lawngtlaia kaltlang turte chu phalsak an ni a, khaw chhungah din khawmuan tur a ni lo.

Partial lockdown hian MDC inthlan ní tur huam mah se, inthlan chu kaltlangpui tura tih a ni a; sorkar thuchhuah chuan, "MDC General Election 2020 chu ni 4.12.2020 hian LADC area-ah neih tur a nih avangin, inthlanna tluang taka kalpui a nih theih nan political party leh candidate-te tan ruahmanna leh kaihhruaina (an zawm tur) siam a ni," a ti. 

Bawrhsapin ruahmanna a siam dan chuan, political party-te’n inthlan kaihhnawiha party thil buaipui tur mi 20 an ruat ang a, an hming DC Office-ah an thehlut ang a, chu'ng mite chuan ṭul bik thilah an party pisa an hawng thei ang. 

Vote thlak ní-ah vote thlak turte'n an venga task force-te ruahmanna siam angin vote thlak tur a ni, tih a ni bawk.