MNF policy SEDP tlangzarh

Chhung tinte eizawnna ngêlnghet an neih thleng ṭanpui kan tum - MNF President

MNF policy thar, Socio Econo­mic Development Programme (SEDP) chu nimin khan Vanapa Hall-ah MNF president Zoram­thanga'n a tlangzarh. Zoramthanga chuan, sorkarna an chan chuan SEDP hnuaiah chhung tinte eizawnna ngêlnghet an neih thleng chhawmdawlna leh ṭanpuina pek an nih dawn thu a sawi.

MNF President chuan, SEDP hnuaiah sing bi den dena sum sem a ni dawn lo tih sawiin, "Chhung tinte’n bul ṭan tirh aṭanga eizawnna nghet an neih thleng chhawm­dawlna leh ṭanpuina pek an ni dawn. Chhung tinte’n eizawnna nghet an neih theihna tur chuan a tlem berah cheng nuai thum tal an mamawh tih kan hria," a ti.

SEDP hnuaiah mi tinin thawh chhuah an neih theih nan ruahmanna siam a ni dawn tih sawiin, Zorama chuan, "GSDP tihsan dâwrh kan tum dawn. Mizo contractor tan a tam thei ang ber hna siam a nih theih nan Mizoram construction corporation din a ni ang a, hei mai bakah hian, lekhathiam hna hmu lote tan unemployment allowance thla tin pek a ni ang," a ti a; lo neitute chu crop insurance leh price support siamsak an nih tur thu a sawi.

SEDP kalpui turin sum tam tak a ngai dawn tih sawiin Zoramthanga chuan, "Engtinnge sum kan neih ang, tih hi zawhna awm thei a ni. He policy kalpui nan hian budget-ah sum kan dah dawn a, vbc. 1000 chuang pawh kan dah mai ang. Budget-a kan pawisa dah chu a chi atan mai chauh a ni dawn a, sum pui tak tak chu sorkar laipuiah sum tam tak a thiam tana sawi chhuah tur a awm," a ti.

MNF President chuan, SEDP hmanga Zoram mipuite’n malsawm­na an dawn chuan Chanchinṭha hrilh nan sum tam zawk an hman theih tur thu sawiin, "Hei hi kan duhthusam ber a ni. MNF hian Pathian leh kan ram tan, kan tih hi kan ti mai mai lo," a ti a; sorkarna an siam chuan a hma thei ang bera zu zawrh tihtawp a nih tur thu a sawi.

Zoramthanga chuan, chawa intodelh chu MNF tum bulpui ber a nih thu sawiin, "Chaw han tih hian buh, wheat, sa, hriak leh thlai hrang hrangte a huam. Mizoramah hian leileta siam theih ram hectare 70,000 chuang a awm a, khawl hmangin leileta siam a nih chuan chawa Mizoram intodelhna khawp a thar theih dawn a ni," a ti.

Inkhawm hi MNF sr. vice president Tawnluia'n a kaihruai a, SEDP Drafting Committee chairman Dr R Lalthangliana chuan, SEDP-ah economic chauh ni loin, mihringin a mamawh zawng zawnga hma an sawn theihna tur ruahmanna siam a nih thu a sawi.