Dan bawhchhiat ka nei lo - Deputy Speaker

Nimin Assembly se­ssion-ah deputy speaker R Lalrinawma'n inkhawm a kaihhruai avangin eptu MLA-te'n House an chhuahsan. R Lalrinawma chuan, minister demand sawihona a tihtawpah dan bawhchhiat a neih loh thu a sawi.

Assembly session hi a tirah chuan speaker Hiphei-a'n a kaihruai a, zawhna leh chhanna, paper pharh leh report pek a zawh hnua minister-te demand sawiho a nih dawnin, Speaker hi deputy speaker R Lalrin­awma'n a thlak a, eptu MLA-te chuan House an chhuahsan nghal a ni. Chawlhlâwk zawhah inkhawm hi Speaker-in a kaihruai leh avangin eptu MLA-te pawh an tel leh a ni.

R Lalrinawma chuan, dan leh hrai a hriat thu sawiin, "Dan zawm loh ka nei lo. Hun ka pek chhungin an phar miah lo, tichuan minister a ding tawh a, ṭhuttir leh kha chair aṭang chuan a nuam tawh lo a ni," a ti.

Mi thu sawi duh lo chung sawi tura innghah tlat chu a tih tur pawh nia a hriat loh thu sawiin Deputy Speaker chuan, "Tumahin bán an phar loh avangin minister wind up turin ka sáwm mai ang, ka ti a. Minister din tawh hnuaah 'I vei lam aṭang hian kan phar a lawm, i hmu lo a nih kha' an ti a ni," a ti a; a hawi kual a hawi kual pawhin bán phar a hmuh loh thu a sawi.

R Lalrinawma chuan, minister demand sawihona a tihtawpah tih dik loh a neih a hriat loh thu sawiin, "House zahawmna vawn tur. Opposition lam chauh kha sawi duh si ding lo an ni lo. Rulling lam aṭang pawhin chhun chawlh hnuah, 'Keipawh sawi ka tum ve asin maw le, kan tawp ta mai si,' ti an awm. An din miau loh chuan mi rilru ka hre si lo," a ti.

Tarlan tawh angin, eptu MLA-te chuan Ni­lainia Assembly session-ah minister demand sawi­ho laiin, thusawi tura bán an phar chungin Dy. Speaker-in sawihona a titawp niin an sawi a; Dy. Speaker kaihhruaina hnuaiah chuan tun ṭum session-ah House-a ṭhut an tum tawh lo a ni.