Din champha lawm

Mizoram Journalists' Association (MJA) chuan nimin khan Aizawl Press Club-ah an din champha an lawm a, IPR director Lalnithangi'n a hmanpui.

MJA din champha lawmna hi MJA vice president Zonunsanga Khiangte-in a kaihruai a; Lalnithangi chuan, Mizorama chanchinbu bul ṭan tirh leh MJA din ṭan tirh aṭanga thlira hmasawnna a awm chu ropui a tih thu sawiin, "MJA-te'n an nodal department anga IPR an en thei leh thawhhona ṭha tak kan nei hi a lawmawm hle," a ti.

MJA president Vanlalrema Vantawl chuan, "Mihring kum chhiarah kum 45 chu mi puitlinga chhiar an nih tawh avangin pawl angin puitlinna kawng zawh zel a pawimawh.," a ti.

MJA hi March 23, 1972-ah din a ni a, president hmasa ber chu tuna chief minister ni mek Lal Thanhawla a ni. General headquarters bakah, Mizoram distrtict pasarihah district headquarters leh sub-division pakhat an nei a, member 190 an awm mek.