Phulpui khuain Kurtai Kût an hmang
Phulpui khua chuan nimin khan an khaw khelmualah Kurtai Kût an hmang a, Agriculture minister R Lalzirliana khuallian niin, parliamentary secretary (Agri) Lt.Col. ZS Zuala khualzahawm a ni.
Agriculture Minister chuan, Phulpui khuain Kurtai Kût an hmang thei chu a lawmpui thu sawiin, "In ṭanrualna hi a ropui ka ti a, lo ṭangrual zel rawh u. Ṭangrual na nâ nâ chu beih an har a, taima takin lo thawk zel ang che u," a ti a; Phulpui khuain hma a sawn nasa a, kawng leh infiamna hmunhmaah pawh nasa taka hma an sawn thu a sawi.
R Lalzirliana chuan, mi ṭhenkhatin sem policy an tihsak NLUP chu a bulṭhut (grassroot level) aṭanga mipui retheite
ṭanpuina a ni tih sawiin, "Hetiang hi tih a la ngai a, kan la ti zel dawn. NLUP hi sum sem ringawt a ni lo, sem ringawt a nih lohzia chu kut hnathawktute'n an hre chiang," a ti a; sem policy tia sawitute chuan a nihna tak an hre lo niin a sawi.
Home minister ni bawk Lalzirliana chuan hel chungchang sawi langin, "Hel chungchangah hian eptu MLA ka nih laiin nasa takin ka sawi a, ka nunna atan a hlauhawm tih CID report avangin house guard min pe hial a ni. Ruling kan a, Home Minister ka nih hnuah pawh helte hi vawite khat pawh duhsakna ka la lantir ngai lo. HM ka nih tirh aṭangin an training-nate kan dap nghal char char, an ralthuamte nen a man theih theih kan man a ni," a ti.
R Lalzirliana chuan, inthlan a hnai leh tawh a, mi ṭhenkhat, politics grassroot luhchilh peih si lo leh mi chhuat dàia luhchilh peih si lo, ruling party sawisel an inlar leh ṭan niin a sawi a; miretheite hmangaihna chu ṭawngkama ringawt ni loin, a tak takin a lang tur a ni tih an hria a, chu chu an sorkar ngaihdan a nih thu a sawi.
Khualzahawm Lt.Col. ZS Zuala chuan, Phulpui khuain nasa taka fu chíng a, an thawh rah senga an hlâwkpui leh Kurtai Kut an buatsaih thei chu a lawmpui thu a sawi a; nasa zawka hma la a, Mizoram mamawh ang thar chhuah tum turin a fuih.
Bialtu MLA KS Thanga, parliamentary secretary chuan, Phulpui khuaa fu hmanga eizawngte chu fûr lai, kurtai harsat lai pawha tam zawk supply thei tura ṭan la turin a fuih a, "Chhungkaw zat ngaihtuaha fu chîng nasa ber khua in ni a, in thawhrimna hi a chhuanawm hle a ni. In eizawnna atana pawimawhah hian sorkar hi a tím eih dawn lo a, in ngháwngkawlte kha link road hmangin kan chhâwk dawn che u a ni," a ti.
Kurtai Kûtah hian NLUP Implementing Board vice chairman PL Thanga, Agriculture director J Lalzamliana leh department hotu dangte pawh an tel a; hnam làm, zai leh intihhlimna chi hrang hrangin hun an hmang. Fu her dan leh kurtai siam dan a takin an entir a, tlaiah khawtlangin ruai an ṭheh a ni.
Phulpui khuaah hian kum 1910-1920 velah fu huan siam an awm ṭan a, a siam hmasa ber chu Lt.Col. ZS Zuala pû, Dorikhuma a ni. Tun dinhmunah Phulpuiah hian chhungkua 220 an awm a, chung zinga chhungkaw 133 chu fu huan neia eizawng an ni a, chu chu chhungkaw awm zat aṭangin 60.45% an ni.
Tuna fu chìnna zawng zawng zau lam belhkhawm chu ṭin 240 vel hmun a ni a, kum khatah fu leh kurtai aṭangin Rs. 3,36,00,000 vel an thar chhuak theia chhût a ni.