KHAWTHLIR

Home tlawh
Zirtiri Residential Science College-a B.Sc. (Home Science) final year zirlaite leh zirtirtute chuan nimin khan New Serchhip-a Salvation Army enkawl Old Age Home (Beiseina In) an tlawh. Zirlaite hi 32 an ni a, associate professor Lalsangkimi Hmar leh assistant professor Mimi Lalmuanawmi ten an hruai a ni. Home an tlawh chhan chu an syllabus-ah a tel vang a nih thu an sawi.

Kal phal lo
Traffic SP chuan thupek chhuahin, Vaivakawn Police Station leh Kanan Veng Presbyterian biak-in inkar kawng siamṭhat hna SIPMIU-in an thawh dawn avangin, March 31, 2017 thleng zing dar 10:30 aṭanga tlai dar 4 inkarah lirthei kal phal a ni dawn lo tih a tarlang.

VTP zat
Labour, Employment & Industrial Training department changtu chief minister Lal Thanhawla chuan MNF member Dr K Beichhua zawhna ziaka chhangin, Mizoram sorkarin vocational training provider (VTP) state páwnah 32 leh Mizoram chhungah 24 a neih thu a tarlang.

Thisen pe
Congress party ṭhalaite chuan nimin khan Congress Bhavan-ah blood donation camp an huaihawt a, Aizawl Civil Hospital tan thisen unit 94 pein, a petute mipa 91 leh hmeichhia pathum an ni.

Hriat thei loh
Land Revenue & Settlement minister R Romawia chuan, Land Revenue dan angin riverine reserve forest, Tut-Langkaih Protected Forest Reserve leh Aizawl-Silchar Road Side Reserve Forest huam chhunga LSC, periodic patta, agriculture leh LSC, etc. zat hriat theih a nih loh thu MNF member Lalruatkima zawhna chhangin House a hrilh.