Tahan-ah Chapchar Kût hman a ni

Myanmar rama Tahan leh a chhehvela Mizote chuan nimin khan Tahan Mizo Welfare Organisation (MWO) buatsaihin Tahan khelmualah Chapchar Kut an hmang a, Mizoram aṭang pawhin mi eng emaw zatin an hmanpui.

Chapchar Kûta khuallian Khawtin­siami, Myanmar sorkara MP ni mek chuan, "Kan inunauna leh inpumkhatna hi a ngheh deuh deuh beiseiin Zofate kût tinreng hi hman vek ka duh ṭhin. Parliament-ah mipui tana rawngbawl tur ka nih avangin kût hrang hrang hi kan hmang thei lo mai zawk a ni," a ti.

Khawtinsiami chuan, lal ni tura thlan a ni lo a, mipui rawngbawl tura thlan a nih thu sawiin, an pi ber Aung San Suu Kyi pawhin Myanmar-a hnam hrang hrangte chu zalen taka an hnam zia leh nunphung chawisan a ngai pawimawh tih a sawi.

Tahan MWO president Lalthangliana chuan, Chapchar Kût Mizoram aṭanga hmanpuitu Central YMA hruaitute chungah lawmthu sawiin, "Tuilian tuarte

ṭanpuina atana CYMA hnathawhte avangin lawmthu kan sawi a ni," a ti a; Mizoram CM Lal Thanhawla fak­in, "Nikuma Chapchar Kûta a lo kal avang khan Káwl phaia Zo hnahthlakte in­pumkhatna a ṭhat phah hlein ka hria," a ti.

Chapchar Kût hawnnaah hian Kalay DC Aung Zaw Moe leh Tahan Branch MWO president Lalthangliana ten ribbon chep chatin an hawng a; Tahan leh a chhehvela khaw hrang hrangin Cheraw kânpui neiin, Cheraw kân thiam bera thlan Tuivar khua hnenah lawmman hlan a ni. Hnam làm dang leh zai chi hrang hrang entir a ni a, zaithiamte an zai bawk.

Tahan Chapchar Kûtah hian Mizoram aṭangin CYMA assistant secretary R Lalngheta, Finnance secertary Lalrochuanga Pachuau leh CEC member pahnih an kal a, MZP president Lalsangzuala Ngente leh mi dang eng emaw zat an tel bawk a ni.