Mizoram Merchant Association-in Ni tin dawr hawn theih loh chuan Dawr zawng zawng khâr an tum
Sumdawng inzawm khawm Mizoram Merchant Association (MIMA) leh an hnuaia pawl hruaitute nimina ṭhukhawm chuan, ni tin dawr hawn vek an duh a, an duh dan hi June 27 thlenga tihhlawhtlin a nih loh chuan ni thum chhung (June 29 - July 1) dawr zawng zawng khâr vek an rél.
An ṭhutkhawm zawha thuchhuah an siamah MIMA chuan, Covid-19 vanga March 22, 2020 aṭanga Mizorama total lockdown neih chu sumdawngte'n an thláwp hle ṭhin tih tarlangin, "Sorkar hmalakna pawh ṭha kan tiin chhuanawm a ti hle ṭhin. Total lockdown hian dawr hawnna chance pe miah loa ni 90 chuang min khàrsak hnuah, LTF-te'n sumdawngte harsatna hrethiamin mahni area ṭheuhah dawr inhawn chhâwk dan felfai taka an duan chu lawmawm kan ti a, an chungah lawmthu kan sawi a ni," an ti.
LTF ruahmanaa dawr hawn chhâwk dan mumal taka siam chu sorkarin a khap nia sawiin MIMA chuan, "Sorkarin total lockdown kalpui dan pangngai bawk kalpui tura hma a la hi uchuak kan tiin kan ngaithiam lo tak zet.
Sumdawngte hian CC loan kan la a, dawr leh kudam luah man a ngaih bakah, mi chhawrte hlawh pek reng a ngai a ni," an ti a, sorkarin lockdown a kalpui dan chu manganthlak an tih thu an sawi.
MIMA chuan, sumdawngte manganna leh duh dan ziak leh ṭawngkain State Task Force chairman Chief Secretary hnenah an thlen ṭhin tih tarlangin, "Ngaih pawimawh a hlawh ngai lo. Official-te hi an hlawh a kiam ve loh avanga mi dang harsatna ngaihtuah miah loa ro an rêl ṭhin hi kan ngaithiam lo. Kan duh dante Chief Secretary hnenah kan thlen ang a, June 27 hmaa tihhlawhtlin a nih loh chuan June 29 aṭanga July 1 thleng lungawi lohna lantir nan Aizawla dâwr zawng zawng khâr vek a ni ang," an ti.
MIMA hian ni thum chhung dawr khàrin awmzia a neih loh chuan tiamchin awm loa dàwr khar tura hmalak an tum.
Mizoram Merchant Association (MIMA) chuan lungawi lohna lantir an tum chungchanga an resolution chu Chief Secretary hnenah an thehlut a, a hnuaia mi hi resolution chu a ni.
MIMA resolution
Sumdawnna hmun hawn: Covid-19 hian eng chen nge min chênchilh dawn hriat a ni lo a, chuvangin, ṭàmpui mitthi kan tawrh lohna turin ei kan zawn ngei tawh a ngai. Kan sumdawnna hmunah ni tin hna kan thawh theih ngeina turin hma min laksak tur a ni.
State dang aṭanga lo hawte hnen aṭang chauhin positive hmuh chhuah a ni a, chu mai bakah, thihpui kan la awm lo a, positive-te pawh serious an awm loh mai bakah, positive pawh dam an awm chho mek zel. Hetiang a nih laia sumdawngte'n kan sumdawnna hmuna hna kan thawk thei lo reng mai hi ngaihthiam har kan ti tawh tak zet a ni.
Lockdown ṭan tirh aṭanga vawiin thlengin damdawi dawrte leh essential commodity dawrte chu social distancing awm hlei thei loin mipui thil lei tur an intlar pút ṭhin a, mahse, tu mah dawr aṭang hian Covid-19 kaia positive hmuh chhuah an la awm lo. Hetiang a nih avang hian ramria fimkhur taka duty a nih chuan community spread a awm a rinawm loh a ni.
Sumdawngte chhiah chhùn luh hi khawvel ram economy innghahna bul ber a ni. Kum 2018-19 a Mizorama sumdawngte GST chhûn chu cheng vbc. 662 a ni a, hei hian Mizoram sum dinhmun nasa takin a chawi kâng. Dawr tinin professional tax Rs. 2,500 an pe vek bawk. Tun dinhmunah India ram ṭhenkhata Covid-19 tamna hmunah ngei pawh an economy dinhmun a tlakchhiat nasat dawn avangin sumdawnna hmun tam tak an inhawng tawh a, Mizoram pawh kan economy tlachhe lutuk tur vèn nan leh mipui mangang lutuk tur ngaihtuahin, sumdawnna hmunte
ṭha taka kalpui ran kan mamawh tak zet. Chutianga ngaihtuahna kalpui a nih loh chuan kan ram economy hi a ṭhuanawp nasa hle thei a ni.
Quarantine centre tih loh chu khawi lai mah containment area a awm lo a, green zone vek a ni. Hetiang a nih laia sumdawngte eizawnna khàrsaka a awm reng hi hriatthiam harsa tak a ni.
State dangte chuan sumdawnna hmun hawn an phalin, shopping complex leh mall thleng pawhin hawn an phal tawh a, hetiang a nih laia sumdawngte dawr khâr bik reng hi ṭul kan ti tawh lo.