Mara zirlaite'n Mara House an dang

Mara Students Orga­nisation (MSO) chuan Aizawla Mara zirlai, mipa leh hmeichhe hostel sak chhunzawm phûtna atan nimin aṭang khan tiamchin awm loin Aizawl Zotlanga Mara House-a lut leh chhuak turte an dang.

MSO hruaitute chuan, an thil phût chungchangah Mara Autonomous District Council (MADC) hruaitute hnen aṭanga thu lawmawm an hmuh hma chuan Mara Hostel-a lut leh chhuak turte dan tur thu an sawi a, "March 13, 2017 khan hostel sak hna chhunzawm tur hian MADC hotute kan lo phût tawh a, CEM RT Zachono chuan March 21, 2017 thleng hun pe turin min ngen a ni," an ti.

March 21 a liam hnuah pawh MADC CEM aṭangin thu an dawn loh thu sawiin MSO hruaitute chuan, "Thuneitute nawrna atan Mara House hi kan dang ta a ni," an ti a; Mara House an dan vanga harsatna tâwkte lakah ngaihdam an dil.

MSO hian thil chi hrang hrang tihhlawhtlin an phût a, tihhlawhtlin a nih loh chuan a ṭul anga hmalak zel an tum a ni.

MSO thil phut Ṭhenkhat
• April 10, 2017 hmaa provisional land lease, boundary demarcation & fencing, LSC, AMC Approval for Building Construction tihfel.
• Boys hostel-ah MSO Jt. Hqrs, Aizawl office turin room siam.
• Boys hostel approach road chu plan & estimate-a ruahmanna siam angin, bitumen emaw cellfilled concrete cement-a siam.
• MADC hminga girls hostel LSC thlak.
• Girls hostel building chu a sakna tura ram a zîm avangin a building zau zawng plan & estimate zûlzuia sak theih ni lo a, building chung lamah vertical extension siam.