KHAWTHLIR

Kolasib DC Dr H Lal­thlangliana chuan thu­chhuah siamin, Mizoram pawn aṭanga lo haw quarantine centre-a an awm hun chhung hmang zo tawhte chu in lamah hawtir mek zel an nih thu tarlangin, "Quarantine centre aṭanga rawn hawte hi test tul ang angte an pal tlang hnu a, Covid-19 hri lak a him ngei tura ngaih an ni. Fimkhur taka in lam a inenkawl zui tura chah leh councselling neihpui vek an ni," a ti a, veng leh khuate chu quarantine centre aṭang­a chhuakte enhrang lo tur leh an tana awm nawm lohna tur zawnga harsatna siam lo turin mipuite a hriattir.

Aizawl DC Vanlalngaih-saka chuan nimin khan hriattirna ti chhuakin, mipuite chu total lockdown kalpui mek a ni tih hre thar leh tura chahin, "Medical lam leh mithiam ten kan dinhmun enin, total lockdown kalpui a ṭul nia an hriat avangin la kalpui mek a ni; Chuvangin, loh theih loa chhuah ngai anih loh chuan mipui vantlang hi mahni inah tawmim 

ṭheuh turin kan inhriat­tirin kan inngen nawn leh a ni e," a ti.

AH&Vety minister Dr K Beichhua chuan nimin khan Siaha district-a Chhaolo khaw rama AH&Vety ran chaw chìnna hmun leh Siaha District Covid-19 Food Security Consultative Committee hmalaknaa Chhaolo khawtlang vaimîm an chìnna hmun a tlawh. K Beichhua chuan, Covid-19 léng mekah Mizoramah natna vanga thi an la awm lo chu Pathian hruaina a nih thu a sawi.

Kolasib District Border Safety Monitoring Team chuan nimin khan hmun hnihah inṭhenin, an district chhunga Covid-19 hripui dona atana ramri depa duty mek task force-te an tlawh kual a, ei tur leh hmanrua eng emaw zat an pe.

Pradhan Mantri Awas Yojana (PMAY) Housing for All (Urban) hnuaia in sak ṭanpuina, Beneficiary Led Construction (BLC) first instalment chu nimin khan Mamit DC Dr Lalrozama'n DC conference hall-ah a sem.