Sample la lâk sak loh leh la endik lohte Kan zawng chhuak mek - Dr ZR Thiamsanga
Covid-19 Operational Team chairman Dr ZR Thiamsanga, MLA chuan, swab sample lâk tawh endik loh palh leh quarantine centre-a awm sample la lak loh hrim hrim zawn chhuah hna an thawh mek thu a sawi.
Dr ZR Thiamsanga hian nimin khan thuchah a tichhuak a; Zoram Medical College (ZMC) laboratory-ah RT-PCR khawl pathum leh automatate RNA extractor pahnih hman mek a nih thu sawiin, "Thawktute'n zing dar 6 aṭang-
in a tûk zing dar 3 thlengte rim takin an thawk ngar ngar a ni. Tun dinhmunah hian power supply leh internet a ṭhat a, kan kháwl hmante a chhe thut a nih loh chuan ni khatah sample 800 chuang kan en thei tawh a, sample back lock (sample lak tawh la endik loh) tlemtê a ni tawh," a ti.
June 16, 2020 thlenga sample lak chu endik zo tawha an inngaih thu sawiin ZR Thiamsanga chuan, "June 17-18 leh a hnu lama mite pawh exam ṭan leh mek a ni. Tunah hian Chief Minister hmalakna zarah RT-PCR khawl tê chi Mini Lab Quotro ni khata sample 40 aṭanga 48 en theihna district hrang hranga dah turin hmalak mek a ni," a ti a; sample lâk tawh zawng zawngte chu tunkar chhungin endik zawh vek theih an inrin thu a sawi.
Dr ZR Thiamsanga chuan, a tìr lamah sample tam tak an lâk khawm tawh, eng emaw vanga endik loh leh quarantine hmuna rei tak awm tawh, sample la lak loh an awm nual tih sawiin, "Hengho chungah hian an hriatthiamna kan ngen tak meuh a ni. Rei tak lo awm tawh sample lak tawh si, result la hre lote leh rei tak awm tawh sample la lak lohte zawn chhuah hna theihtawpin thawktute'n zawn chhuah hna thawkin theihtawp an chhuah mek a ni," a ti.
Covid-19 Operational Team Chairman sawi danin, swab sample lakna rei tawh result la hre lo leh quarantine-a rei tak awm tawh sample la lak lohte chuan an bialtu (district) chief medical officer emaw, ZMC-a sample khawihtu nodal officer Dr Zorengpuii phone 8415846102-ah hriattir tur a ni.