Champhaia Covid-19 vei damte thlah

Champhai district-a Covid-19 hripui vei hmuh chhuah tawh mi pariat zinga vei leh tawh lo tih finfiah tawh mi palite chu nimin khan Designated Covid Health Centre (DCHC) - Nur­sing School aṭangin chhuahtir an ni a; Champhai chief medical officer Dr R Lianmawia'n thlahin, district zinga dam chhuak rang ber an nei thei chuan enkawltute ṭhatzia a lantir tih a sawi.

Champhai DCHC aṭanga nimina chhuakte hi mipa pathum leh hmei­chhia pakhat an ni a; Nursing School-ah thlahna hun tawi hman niin, Champhai CMO chuan, "District hrang hrang zinga Co­vid-19 natna vei dam chhuak rang ber kan nei thei hian treatment team-te thawhrim leh ṭhatzia a lantir a, thawhhona ṭha vanga tun hun thleng thei kan ni," a ti.

District Hospital-a medical superintendent Dr Zatluanga pawhin, medical staff-te'n thawhhona ṭha tak hnuaia an mawhphurhna ṭheuh an hlen thu a sawi a, "Covid-19 veite hmun dang panpui ngai loa Champhaia ṭha leh uluk taka enkawl an ni thei a, inbuatsaihna leh thawhhona ṭhatzia a entir a ni," a ti.

Champhaiah hian Covid-19 la vei mek mi pali an awm a, mipa pathum leh hmeichhia pakhat an ni a; ngaihtuahawm an ni lo tih sorkar thuchhuah chuan a tarlang.