BJP a sorkar chuan central scheme-in minority-te a thleng ang - BJP President

BJP Mizoram Pradesh president Vanlalhmuaka chuan, Lai Autonomous District Council (LADC)-ah BJP-in sorkarna an siam chuan central scheme-in minority-te a thlen phâk ve tawh tur thu a sawi.

LADC inthlan awm tura Inrinnia Kawrthindeng khuaa a campaign-naah Vanlalhmuaka chuan, "Cheng nuai 3 kan sem ang kan ti ve lo. BJP chuan in nei lote in kan saksak ang a, tui connection nei lote pein, an thlai thar zawrhna tur kan buaipui ang. Pu Modi-a'n hnam hnuaihnung zawk leh rethei zawkte hmakhua a ngai a, ṭanpui turin min ti a, chu chu BJP-in kan ngaih pawimawh ber a ni," a ti. 

Mi hausa aia mi retheite ngai pawi­mawhtu party an nih thu sawiin BJP President chuan, "Central scheme hi minority-te hnenah MNF sorkarnaah hian a thleng pha ngai lo a, BJP sorkar hunah chuan in hnenah a thleng tawh dawn," a ti a; zirna-in, damdawi-in, lonei­tute tana hamṭhatna leh nunaute tana hamṭhatna awm chu central scheme aṭanga tihhlawhtlin a nih tur thu a sawi.

Vanlalhmuaka chuan, PMAY chu a nihna ang taka hman a nih tur thu sawiin, "In sak ṭanpuina te, central scheme dang mi retheite leh loneitute tana hamṭhatna awm chu kan Mizoram sorkar hian a rap bet ṭhin. Central scheme kan hmuh theih nan LADC-ah hian BJP kan sorkar chuan Mizoram sorkarin kawng tam taka kan hmasawnna kawng an dâl ṭhinna hawnin a awm tawh dawn a ni," a ti.