NGO-in CS dan an tum zui lo ; Mizo IAS-te'n Joint NGO an thlâwp lo

NGO Coordination Committee (Joint NGO)-in Mizoram chief secretary atan Mizo ngei dah an phût avanga chief secretary Dr Renu Sharma pisa kái tur dan an tum chu an ṭhulh a, dan tumna an nei tawh rih lo. Hetih lai hian, Mizo IAS officer-te chuan, NGO-te hmalak tum dan chu ṭha an tih loh thu an sawi hlawm.

Vanglaini palai zawhna chhangin Joint NGO chairman R Lalngheta, Central YMA president ni bawk chuan, Joint NGO hruaitute chu June 6, 2022 (Thawhṭanni) tlai khan an ṭhukhawm a, chutah chuan Chief Secretary dan an tum chu kalpui zui loh an rél tih a sawi.

R Lalngheta chuan, Chief Secretary dan an tumna chu hnam dang hrim hrim duh lohna a nih loh thu sawiin, "Mizoram chief secretary ni turin Mizo ni thei an awm ngei tih kan hria a, kan duh dante central lam pawhin an hre tawh a, min ngaihtuahsak ngei kan beisei," a ti.

Chief secretary Renu Sharma pisa kai tur dan an tum chu ṭhulh rih mah se, Mizo ngei chief secretary atan dah tura sorkar laipui an ngenna chu an bawhzui zel dawn thu Joint NGO Chairman chuan a sawi a ni.

Mizo IAS-te thusawi
Mizo IAS officer ṭhenkhat chuan Vanglaini palai zawhna chhangin, chief secretary-ah Mizo ngei dah phûta NGO Coordination Committee-in chief secretary Renu Sharma pisa kái tur dan an tum chu ṭha lo an tih thu an sawi hlawm.

Sorkar laipuia secretary ni tawh P Rohmingthanga chuan, "A pawi ka ti khawp mai a, tih tum loh zawk atan a duhawm. Kan hnam dang ṭhiante pawhin min hmuh dan a danglam phah a hlauhawm tak zet. An thil tum kha ṭha ka ti lo a, tih tawhte chu tih tawh ni se, ni dangah chuan hetiang thilah hian ngaihtuahna fím hman a ngai," a ti.

Manipur-a chief secretary ni tawh PC Lawmkunga chuan, "Mizo ngei chief secretary neih chu kan duh vek. Chutih rualin, an tih dan phung kha tih dan turah ka ngai lo," a ti a; hnam dangin rilru tê, hnam dang ngaithei lo angin Mizote an ngaih a hlauhawm thu a sawi.

Lalnunmawia Chuaungo, Renu Sharma hma chiaha chief secretary chuan, "Tih loh tawp tur a ni a, ti tlang mahse an duh a hlawhtling chuang lo ang a, kan intimualpho mai mai. A bul a bâl zir chiang loa páwng tih ngawt zel hi a ṭha lo. Thil zir chiang chungin, fing taka hmalak zawk tur a ni," a ti.

Tarlan tawh angin, Joint NGO hruaitute chuan May 30, 2022 khan Aizawl Press Club-ah thuthar thehdarhtute kâwmin, chief secretary atan Mizo dah tura an ngennain awmzia a neih loh avangin May 31, 2022 aṭangin chief secretary Renu Sharma pisa kai tur dan an tum thu an puang.

Dr Renu Sharma chu May 31-ah a zin chhuah dawn avangin a pisa kai tur dan an tum chu an ṭhulh rih thu, Joint NGO chuan May 30 zanah an puangzar leh a; Mizorama a rawn let leh hunah a pisa kai tur dan an tum leh tum loh zawhna chu - an ngaihtuah ṭhat leh tur thu Vanglaini an lo hrilh tawh. Renu Sharma hi June 4, 2022 khan Delhi aṭangin Aizawlah a rawn lêt a ni.

NGO Coordination Committee-in Chief Secretary pisa kai tur dan an tum hian social media-ah sawisel a hlawh hle a, mi tam takin ṭha an tih loh thu leh an thlàwp loh thu an tarlang. Facebook-a Central YMA group-a Chief Secretary dan tum chungchanga NGO-te thuchhuak an dah (post) pawh sawi zuina (comment) 86 a awm a, sawi zuitute chuan an thlâwp loh thu an sawi deuh vek a ni.