Millennium Centre-ah zu an man lo - MCDA Zangnadawmna pek ngei phût

Millennium Centre Dawrkai Association (MCDA) chuan thuchhuah siamin, Millennium Centre (MC)-a sorkarin zu an man lo, an ti a, chutihlaiin wine a mante chu a neitute hnenah a pe lêt lo a nih chuan zangnadawmna pe turin Mizoram sorkar an phût tih an tarlang.

MCDA chuan, May 27, 2022-a Excise force-te'n zu an endikna lamah MC chhunga grape wine leh Mizoram thar chhuah wine dang an man tih tarlangin, "Pawi kan ti hle. Kan sorkar leh grape chíngtute'n inhriatthiamna kara thlamuang taka an eizawnna an kalpui laia an thil zawrh lai zawng zawng mansak vek an ni ta mai hi a pawi kan ti. Kan sorkar lam hian pe let leh se kan duh tak meuh a ni," an ti.

Wine man tawhte chu a neitute hnena pêk let a nih loh chuan an mansak hù zangnadawmna wine neitute pek ngei an phût thu sawiin MCDA chuan, "MC-a grape wine zuarte aṭang hian sorkar duh loh leh phal loh zu man tel a ni lo. Kan member-te'n eizawnna bera an hman mansak vek an nih takah chuan kan sorkar hian chem loin an lu an laksak a ni," an ti a, wine neitute an mangang tak zet tih an tarlang.

MCDA chuan, sorkarin Mizorama thar chhuah zawrh a phal dawn lo a nih chuan an hralh zawh hma chu nghakin emaw, hun tiam an siamsak ngei turah an ngaih thu an tarlang a, "Hetiang ngawt hian kan sorkar hian kan ram mipui, kut hnathawkte thar chhuah grape wine an mante hi man hlensakin, kut hnathawktute a timangang tak tak duhin kan ring lo," an ti bawk.