Eirua puhte thiam loh chantir

National Water Shed Deve­lopment Programme for Rainfed Areas (NWDPRA) hnuaia sorkar sum Rs 59,000 eirua puh Saikhaw­thlir khuaa Raichhawkzau Watershed Committee chairman leh secretary-te chu Aizawl District & Sessions Court (PC Act)-a special judge Vanlalenmawia chuan nimin khan thiam loh a chantir.

Court judgement-a a lan danin, Raichhawkzau Watershed Committee chairman Lalnunzira leh secretary K Lawmawma te chu NWDPRA hnuaia ṭanpuina hmuh Rs 14,26,321 zinga Rs 59,000 eiruah puh an ni a; ṭanpuina dawng anga tarlan zinga mi panga chuan ṭanpuina an dawng lo a, sum dawng anga cashbook-a an signa­ture pawh anmahni ziah a ni lo.

He thubuaiah hian Court chuan pawisa eiruk zinga Rs 52,000 a hmu lêt a, chu'ngte chu ṭanpuina dawng turte hnena pek turin a ti a; Lalnunzira leh K Lawmawma te chu High Court-a zualkona hun siamsak niin, bail-a chhuahtir nghal an ni.