NH kawngpui laihna leivûng paih dan Contractor mawhah NHIDCL-in a ngai

National Highways and Infrastructure Development Corporation Limited (NHIDCL) chuan, an hnuaia national highway (NH) kawngpui laihnaa leivûng paih dan chu contractor-te mawhphurhna a nih thu, Mizoram Pollution Control Board (MPCB) an hrilh.

Tarlan tawh angin, NHIDCL hnuaia hmun hrang hranga NH kawngpui laihna leivûngin lui a tihbawlhhlawh nasat avangin MPCB chuan May 25, 2022 khan NHIDCL hnenah insawifiah tura hriattirna (show cause notice) a pe a; hun tiam, ni sarih ral hmain NHIDCL pawhin insawifiahna an thehlut a ni.

MPCB chuan NHIDCL chu NH an siamnaa an hnathawh tihtawpsak an nih lohna tur chhan leh environment an tihchhiat avanga zangnadawmna ṭhìn lohna tur chhan sawifiah turin an hriattir a ni. Leivung paihin lui a tihbawlhhlawh chungchangah complaint an dawn fo avangin MPCB chuan a hma pawhin NHIDCL chu an project awm dante MPCB-a thehlut turin vawi hnih an lo hriattir tawh a, mahse, NHIDCL chuan an la chháng ngai lo.

Vanglaini palai zawhna chhangin MPCB member secretary C Lalduhawma chuan, insawifiah tura an tihna chu NHIDCL-in a hunah an chháng tih a sawi a, "An chhanna kan ûm zui dan turah file a la kal mek," a ti a, MPCB Chairman-te nen la ngaihtuah zui tur a nih thu a sawi.

C Lalduhawma chuan, NHIDCL insawifiahnaah chuan, an hmalakna chu sorkar laipui hnuaia mi a ni a, chuvang chuan MPCB-ah tih tur an neih loh thuin an chháng tih a sawi a, "Leivûng paih dan chungchang chu contractor-te mawh a ni, an ti a, mahse, contractor-te pawh an hnuaia thawk an ni a, an mawhpuh vek chu a dik bik lo ang," a ti.

MPCB Member Secretary chuan, kawng sialna leivûng paih dan tur chu district bawrhsapte nen an ruahman ṭhin thu NHIDCL chuan an tarlang tih a sawi a; an insawifiahnate chu a dikna chin a awm thu leh thil buaithlak deuh eng eng emaw a awm thu a sawi bawk.

NH Aizawl-Tuipang kawngpui siam mekah contractor-te'n leivûng paihna hmun tur ni loah leivûng an paih nasat avang leh chhan dang dang vangin Lunglei Divisional Forest Officer chuan hnathawh chawlhsan nghal turin June 1, 2022 khan NHIDCL a hriattir bakah insawifiah turin a ti. Kawngpui laihnaah forest clearance an neih loh avangin Thenzawl DFO pawhin May 31, 2022 khan stay order a pe nia thu dawn a ni bawk.

NHIDCL hian Tuikhuah­tlangah pisa an nei a, Mizoram hmun hrang hrangah kawngpui an lai mek. NH kawngpui sialnaa leivûng paihin hmun hrang hranga lui a tihbawlhhlawh chungchangah hian MPCB chuan district bawrhsap tin hnenah lehkha thawnin, an huam chhung ṭheuhah C&D Waste Management Rules, 2016 kengkawh ṭha turin a lo hriattir tawh.

MPCB chuan December 10, 2021 khan DC tin hnenah lehkha a pe tawh a, May 23, 2022 khan a pe nawn leh bawk. NHIDCL leivûng paih danah hmun hrang hrang aṭangin complaint an dawn thu tarlangin, DC-te chu an huam chhung ṭheuhah leivûng paih dan en uluk tur leh a ṭul anga hma la turin MPCB chuan a ngen a ni.