Inkhàrkhip kalpui dan siamṭha turin ZPM ṭhalaiin sorkar an phût

Zoram Peoples' Movement (ZPM) Ṭhalai chuan thuchhuah siamin, Mizorama inkhàrkhip thawh sarihna (Lockdown 7.0) kalpui danah ruahmanna fel tâwk lo a awm tih an tarlang a; inkhàrkhip kalpui dan fel lo siamṭha turin sorkar an phût.

ZPM Ṭhalai tarlan danin, Disaster Management & Rehabilitation (DMR) department-in Lockdown 7.0 kalpui dan tur thupek June 21, 2020-a an tihchhuahah, AMC area, district khawpui leh DC-in containment area-a a puanahte chuan lirthei hmanga mipui chêtvel khap tlat a nih thu leh, ṭul bik thilah chuan Aizawl­ah Traffic SP, district dang leh containment area-ah DC-te'n chhuah phalna an pek theih thu a chuang.

Thupek chuan mi­puiah harsatna lian tak a thlen tih sawiin ZPM ṭhalaite chuan, "Loh theih lohna vanga veng hrang hranga chhuak turte'n Traffic SP office-a phalna la tura kal vang vang a ngai leh phalna la tura thui fé social distancing zawm harsa khawpa intlar a ngai hi mipui zah lohna leh Covid-19 dona nena thil inmil lo tak a ni," an ti a; ruahmanna siamṭha thuai turin sorkar thuneitute an phût a ni.

ZPM Ṭhalai chuan, "Commercial vehicle (sumdawnna lirthei) neitu leh khalhtuteah harsa tak tak, mi in luah chunga chhungkaw châwm nan bera hmang ṭhahnem tak an awm avangin, a remchan dan anga an service theihna atan rua­hmanna siamsak ni se. Chu chuan mipuiah pawh motor hman mai tur hriat loh vanga harsatna awmte a sutkian phah ngei kan ring," an ti.