AMC-in insawifiah turin Chawnpui Local Council Chairman a hriattir

Chawnpui Local Council-in an veng ram chhunga leivûng an paihtir chungchangah Aizawl Municipal Corporation (AMC) Commissioner chuan ni 10 chhunga insawifiah turin Chawnpui LC Chairman a hriattir.

AMC Commissioner hian nimin khan Chawnpui LC Chairman hnenah insawifiah tura hriattirna a thawn a; Chawnpui LC ram, Tuikual lui kamah AMC aṭanga phalna la loin Accountant General office leh quarters hmun laihna leivûng a paihtir tih hriat a nih thu a tarlang.

AMC Commissioner chuan, leivûng paihtir tawh lo tura a hriattir rualin, AMC phalna loa leivûng a paihtir avanga a chunga MMA 2007 leh AMC Solid Waste Management By-Laws, 2019 anga hmalak a nih loh chhan tur sawifiah turin a hriattir a ni.